A rôh tơdah pôa Phạm Minh Chính - Ngế pro xiâm hnê ngăn Chin phuh tối, Việt Nam đi đo ngăn nhoăm ƀă gum má môi tơdroăng tơrŭm ki kân pơla Việt Nam - Lếo. Tơrŭm cheăng kal kí rế hmâ achê krá hlối loi nhoăm dêi rơpó khât. Mâu kơvâ tơrŭm cheăng kal ki ê mê cho ‘na lêng, kring gak tơniăn, cheăng kâ, túa lĕm tro, hnê hriâm ƀă hnê mơjiâng tuăn ngôa rơkê ƀă ‘na  tơrŭm cheăng ƀă mâu kong pơlê dêi péa tơnêi têa xuân châ tơmâng mơnhông mơdêk ƀă hlo pơxiâm mơnhông tơƀrê nếo.

Péa pâ  vâ môi tuăn mơ-eăm tơrŭm pêi cheăng, hbrâ tro má môi ăm hneăng hôp má 47 dêi Vi ƀan tơrŭm cheăng tung Chin phuh péa tơnêi têa, mơ-eăm pêi châ tơƀrê kân tâ tung hơnăm 2025. Péa pâ tơmâng khât troh tơdroăng vâ môi tuăn pơtối pêi tơƀrê tung tơrŭm cheăng kâ, tê mơdró  ki péa pâ ‘no liăn cheăng.

Ngế pro xiâm phŏ hnê ngăn kong têa Lếo tối kô pơtối mơdêk mâu khu xiâm, kơvâ cheăng ‘mâi hơ’lêh tơdroăng ‘no liăn cheăng. pro tơ’lêi hlâu tâ nếo ăm mâu khu mơdró kong têa ê, tung mê, ai khu mơdró Việt Nam ‘no liăn cheăng, tê mơdró a kong têa Lếo.