A roh tơdah, pôa Phạm Minh Chính, Ngế pro xiâm hnê ngăn tơnêi têa mơnhên roh lăm pôu pêi cheăng kố kô kum pro trâu hơngế tơ’nôm tơrŭm cheăng ton xŏn pơla Việt Nam – Siam. Tơpui tơno ‘na tơrŭm cheăng pơla péa pâ, pôa Phạm Minh Chính pơkâ thế péa tơnêi têa pơtối mơdêk ƀă djâ tơrŭm cheăng chiâng Khu tơrŭm cheăng ton xŏn Việt Nam – Siam to a râ a’ngêi tâ; mơdêk tơpui tơno khu râ kăn xiâm ƀă mâu râ tá ƀâng Đảng, Tơnêi têa, Chin phuh ƀă Kuô̆k hô̆i.

Klêi mê, pêi pro châ tơƀrê mâu troăng tơrŭm cheăng pơla péa pâ, ki rơhêng vâ tối cho troăng hôp Chin phuh tơdjuôm xua péa Ngế pro xiâm hnê ngăn tơnêi têa. Ngế pro xiâm hnê ngăn tơnêi têa xuân pơkâ thế péa pâ thăm pêi pro Tơdroăng pêi pro tơrŭm cheăng Khu tơrŭm cheăng ton xŏn Việt Nam – Siam hneăng hơnăm 2022 – 2027.