Ngế pro xiâm hnê ngăn tơnêi têa mơnhên tối, Việt Nam đi đo nhuô̆m tơrŭm cheăng Việt Nam – Israel. Mơnhên péa kong têa cheăng kâ ai hên tơmeăm ki rơdêi kum ăm dêi pó, Ngế pro xiâm hnê ngăn tơnêi têa pơkâ thế péa tơnêi têa rĕng thâ pêi pro châ tơƀrê 'na Pơkâ Tê mơdró tơ’lêi hlâu xua Việt Nam – Israel ƀă hriăn plĕng tơdroăng tơpui tơno, kĭ tơkêa môi tuăn tơrŭm tung kơvâ kơmăi kơmok pơla péa tơnêi têa; mơjiâng pro tơ’lêi hlâu ăm mâu tơdroăng tơpui tơno khu tê mơdró, tơrŭm tơkŭm po mâu tơdroăng mơhnhôk tê mơdró, tơdjêp tê mơdró; Israel thăm rôe mâu tơmeăm ki kơnâ dêi Việt Nam môi tiah tơmeăm khoăng pêi lo ing chiâk deăng, ká xi xŏng, kơchâi, plâi, pôm drêh ngiât, tơmeăm uâ mơdiê ƀă mâu tơmeăm xúa tung rơpŏng hngêi.

Ngế pro xiâm hnê ngăn tơnêi têa pơkâ thế péa pâ thăm pêi pro rơdêi tơrŭm cheăng ‘na pơ'lêh nếo tơmiât pêi rơkê, kơvâ cheăng kơmăi kơmok rơxông nếo, tơrŭm ‘na têa kơxĭ, hbrâ ví kong prâi hơ’lêh, tung mê ai tơrŭm hbrâ ví kong tô khăng khoăng a mâu kong pơlê peăng tơdế tơnêi têa; hnê mơjiâng mơngế pêi cheăng ki rơkê.