Péa Ngế pro xiâm hnê ngăn tơnêi têa phiu ro châ hlo tơrŭm cheăng pơla péa pâ mơnhông tá hâi chói ai ƀă tâi tâng tung mâu kơvâ cheăng; mơnhên tơdroăng khŏm mơ-eăm djâ tơrŭm cheăng to a’ngêi nếo. Péa pâ môi tuăn tơrŭm cheăng kâ xuân cho ki xiâm kal khât tung tơrŭm pơla péa tơnêi têa; tơrŭm cheăng pêi pro châ tơƀrê Pơkâ khung ‘na tơdjêp péa tơdroăng cheăng kâ ƀă Khu tơrŭm cheăng kâ krúa lĕm kong prâi – cheăng kâ xúa kŏng ngê̆ Việt Nam – Singapore, ki má lối cho tơdjêp hyôh internet; mơjiâng pro kơmăi VSIP 2.0 krá tơniăn, rơkê; mơjiâng on tơhrik krúa lĕm.

Péa Ngế pro xiâm hnê ngăn tơnêi têa xuân tối rơdêi kal thăm tơrŭm tâ nếo tung mâu kơvâ ki kal ki ê môi tiah gâk kring tơnêi têa – gâk kring, hnê hriâm – hnê mơjiâng tuăn ngôa rơkê, khôi túa lĕm ƀă trâm mâ kuăn pơlê. Pôa Phạm Minh Chính, Ngế pro xiâm hnê ngăn Chin phuh mơnhên kô pro tơ’lêi hlâu ăm mâu khu tê mơdró Singapore po rơdâ mơ’no liăn cheăng a Việt Nam.