VOV4.Xơ Đăng - Kơxê hâi lơ 21/6 a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng trâm mâ tơpui tơno ƀă pôa Esperanca Bias, Kăn xiâm hnê ngăn Kuô̆k hô̆i kong têa Mozambique dế ai roh lăm pôu pêi cheăng a Việt Nam. Pôa Phạm Minh Chính rơkâu kong têa Mozambique roh apoăng châ rah xo pro Kăn cheăng ôh tá hnê mơhno má môi Grup kring vế Khu lâp kong têa hneăng hơnăm 2023 – 2024 ƀă kơxô̆ phĭu cho hên ƀă loi tơngah Mozambique kô pêi kêi đeăng tơtro hnoăng cheăng kố, kum hên tung hơniâp lĕm, gâk kring, tơrŭm ƀă mơnhông mơdêk kơpong ƀă lâp plâi tơnêi.

Ngế pro xiâm hnê ngăn tơnêi têa mơnhên tơmeăm ki ai hlâu tơrŭm cheăng pơla Việt Nam ƀă Mozambique ối hên, Việt Nam hbrâ hnê túa ki rơkê tơtro mơnhông mơdêk ƀă tơpui tơno, mot tơrŭm cheăng ƀă Mozambique; pơkâ mâu troăng vâ pro trâu hơngế tâ nếo tơrŭm cheăng pơla péa pâ ƀă pói vâ Kuô̆k hô̆i péa tơnêi têa pơtối môi tuăn, tŏng kum, pro tơ’lêi hlâu ăm tơdroăng pêi pro.

Kăn xiâm hnê ngăn Kuô̆k hô̆i Mozambique mơnhên kong têa Mozambique ngăn Việt Nam cho môi tung mâu khu tơrŭm ki kal má môi a châu Á; tơkêa mơnhông mơdêk hnoăng kơ koan mơjiâng luât, môi tuăn ƀă pro tơ’lêi hlâu ăm tơdroăng thăm tơrŭm cheăng pơla péa tơnêi têa.

A Sa Ly tơplôu ƀă tơbleăng