A rôh trâm mâ, pôa Phạm Minh Chính tối nhên, Việt Nam ngăn nhuô̆m ƀă môi tuăn hnoăng cheăng ki xiâm dêi Khu lâp kong têa tung tơdroăng pơkuâ ngăn lâp plâi tơnêi, vâ hbrâ ví ƀă mâu tơdroăng ki pơloăng mơnúa tơdjuôm ki kân khât môi tiah nôkố ƀă Việt Nam tơhrâ kô veăng kum kơhnâ tung mâu tơdroăng ki kơjo kum kân dêi Hneăng hôp kân Hneăng 78.

Pôa Dennis Francis, Kăn hnê ngăn Hneăng hôp kân Khu lâp kong têa mơnhên tối khât tơrŭm Khu lâp kong têa – Việt Nam. Pôa Dennis Francis ai tối tiah kố, Việt Nam ai hên tơdroăng ki ƀlêi chiâng ‘na tơdroăng ki ăm kuăn pơlê hluăn ing kơtiê ƀă tơnêi têa mơnhông tơtêk, mơni kô tối ăm kong têa ê, rơtế mơdêk tơrŭm cheăng pêi pro mâu Tơdroăng pơkâ Mơnhông krá tơniăn, hbrâ ví ƀă kong prâi pro hơ’lêh, bê tŭm kế kâ.

Kăn hnê ngăn Hneăng hôp kân môi tuăn kô tơrŭm rơtế ƀă Việt Nam vâ mơdêk pêi pro tiô Luât Khu lâp kong têa, luât plâi tơnêi ƀă troăng hơlâ ki hên kơvâ cheăng.

Xuân tung rôh kố, pôa Phạm Minh Chính, Ngế pro xiâm hnê ngăn Chin phuh hiăng trâm Ngế pro xiâm hnê ngăn kong têa Siam. Péa pâ hiăng môi tuăn rơtế tơbleăng mâu tơdroăng ki kal xiâm tơrŭm cheăng vâ mơdêk tơrŭm cheăng kong têa tung la ngiâ Việt Nam – Siam pơtối mot trâu rơdâ, tơƀrê, ai pơxúa.