Tung chôu phut trâm mâ, pôa Phạm Minh Chính, Ngế pro xiâm hnê ngăn Chin phuh khĕn kơdeăn hnoăng cheăng dêi Kăn xiâm chêh tôm xo rơkong khu lâp kong têa hơniâp lĕm, tơniăn tung lâp plâi tơnêi, tơleăng mơnhên tơdroăng dế ôh tá tơniăn, hlối tối Việt Nam môi tuăn ƀă hbrâ vâ ‘no hnoăng tung tơdroăng mơ-eăm mê.

Ngế pro xiâm hnê ngăn tơnêi têa môi tuăn mâu tơdroăng pêi ahdrối nôkố dêi Kăn xiâm chêh tôm xo rơkong, tung mê hbrâ hneăng hôp kân tung la ngiâ kô po a hơnăm 2024. Ngế pro xiâm hnê ngăn tơnêi têa ăm ‘nâi Việt Nam dế mơ-eăm tơrŭm ƀă mâu khu tơrŭm cheăng tung Khu lâp kong têa, tơbleăng hên tơdroăng tơrŭm pêi, malối ‘na kring tơniăn lâp plâi tơnêi, veăng kring tơniăn khu lâp kong têa a hên tơdroăng ki dế ôh tá tơniăn, hơ’lêh pêi mâu Pơkâ mơnhông krá ton, hơ’lêh xúa on tơhrik tơdâng tơ’mô, pêi tơdâng tơ’mô tơdroăng rêh ối, ôh tá lôi ngế ki lâi pá rŏng.

Rôh kố, pôa Phạm Minh Chính, Ngế pro xiâm hnê ngăn Chin phu tơngah pôa António Guterres, Kăn xiâm chêh tôm xo rơkong Khu lâp kong têa lăm pôu Việt Nam.

*** Xuân a New York, pôa Phạm Minh Chính, Ngế pro xiâm hnê ngăn Chin phuh hiăng tơdah kăn teăng mâ dêi kăn xiâm pơkuâ kong têa Mih ‘na hyôh kong prâi cho pôa John Kerry, tơpui ‘na mâu tơdroăng vâ rĕng tơbleăng mâu tơkêa ki kal dêi rôh lăm pôu, malối cho tung kơvâ ki hbrâ ví ƀă kong prâi pro hơ’lêh.

Rơtế a hâi lơ 21/9 tiô chôu kong têa, pôa Phạm Minh Chính, Ngế pro xiâm hnê ngăn Chin phuh hiăng tơpui tơno troăng hơlâ ai inâi: “Mơdêk ƀă mơnhông krá tơniăn ton tung tơdroăng cheăng kâ  lâp plâi tơnêi hơ’lêh” ƀă mâu yăo sư, khu ki rơkê ‘na cheăng kâ, khu rơkê ‘na hriăn ngăn lo ing mâu hngêi trung đăi hok Harvard, Columbia, Yale.

Kố cho mâu tíu ki hnê hriâm ƀă hriăn ngăn troăng hơlâ ki hiăng ai sap ing ton nah, ki tơdjâk ƀă inâi ki vâi ô eăng a kong têa Mih ƀă tung lâp plâi tơnêi. Tơpui tơdjâ, pôa Phạm Minh Chính, Ngế pro xiâm hnê ngăn tơnêi têa tối nhên Việt Nam đi đo ngăn nhuô̆m tơdroăng ki mơdêk tơpui kâ, tơpui tơno, tiâ mơnhên troăng hơlâ tŏng kum ‘na cheăng kâ, mơjiâng bro mâu tíu xiâm hriăn ngăn ki xiâm dêi lâp plâi tơnêi.