Kơmăng hnah (23/10), tiô chô a kong têa ê, tung tơdroăng po mâu tơdroăng veăng Hneăng hôp khu râ kăn xiâm mâu Khu râ kăn pơkuâ BRICS po rơdâ a Kazan, kong têa Rusi, pôa Phạm Minh Chính, Ngế pro xiâm hnê ngăn Chin phuh hiăng trâm pôa Recep Tayyip Erdogan, Kăn xiâm pơkuâ kong têa Thổ Nhĩ Kỳ.

Ngế pro xiâm hnê ngăn Chin phuh mơnhên nhuô̆m tơrŭm cheăng nhŏng o ƀă tơrŭm lĕm tro Việt Nam - Thổ Nhĩ Kỳ; pói vâ mâu khu tê mơdró Thổ Nhĩ Kỳ tơmâng mơ’no liăn cheăng hên tâ nếo a Việt Nam. Péa Kăn xiâm pơkuâ môi tuăn thăm tơpui tơno, trâm mâ pơla khu râ kăn pơkuâ péa tơnêi têa, rĕng mơdêk râ ƀă pro trâu hơngế tâ nếo tơrŭm cheăng péa tơnêi têa; mơdêk ó rơdêi tơrŭm cheăng kâ, tê mơdró tơxâng ƀă tơmeăm ki ai hlâu, mơ-eăm rĕng châ pơkâ châ pêi lo liăn pơla péa pâ 4 rơtal dollars, tơdrêng amê hriăn plĕng mơjiâng mâu tơdroăng nếo vâ pro tơ’lêi hlâu tâ mê nếo ăm tê mơdró ƀă mơ’no liăn cheăng.

Hdrối mê, a pơlê kong kân Kazan, kong têa Rusi, pôa Phạm Minh Chính, Ngế pro xiâm hnê ngăn tơnêi têa trâm mơngế Việt Nam a Rusi.