Drêng rôh po tơdroăng kố, ngế ki pơxiâm dêi Chin phuh Việt Nam tiô tối hdrối kô ai mâu rôh trâm mâ pơla péa pâ, trâm ƀă tơpui tơno ƀă kăn pơkuâ, Kuô̆k hô̆i Mih, veăng hôp a mâu rôh hôp ki ai tơdjâk troh cheăng kâ, tê mơdró pơla péa tơnêi têa. Tíu pơtê chêng ki apoăng dêi pôa Phạm Minh Chính, Ngế pro xiâm hnê ngăn tơnêi têa a Mih cho San Francisco ƀă hên tơdroăng cheăng ki kal.

Malối, pôa Phạm Minh Chính, Ngế pro xiâm hnê ngăn tơnêi têa kô veăng hôp ƀă tơpui a Rôh hôp Khu mơdró kâ Việt Nam – Mih 2023 ai inâi “Mơdêk râ tơrŭm cheăng Việt Nam – Mih ƀă rôh tơ’lêi hlâu ăm khu mơdró kâ kơmăi kơmok Mih a Chin phuh Việt Nam kô troh pôu mâu khu mơdró kâ cheăng ƀă kơmăi kơmok dêi Mih a Thông Silicon; pôu ƀă pêi cheăng a kŏng ti mơjiâng bro chip NVIDIA; pôu pêi cheăng a kŏng ti Meta.

Klêi kơ’nâi troh a pơlê kong kân San Francisco, kong pơlê kân California, kong têa Mih, pôa Phạm Minh Chính, Ngế pro xiâm hnê ngăn Chin phuh hiăng ai roh trâm hên tơdroăng ki tâ rơrêk lĕm tung hiâm mơno ƀă kăn teăng mâ mơngế Việt Nam rêh ối a kong têa Mih.

A roh trâm mâ, kăn teăng mâ kuăn pơlê pin ki rêh ối a kong têa ê tối phiu ro klêi kơ’nâi Việt Nam ƀă Mih chiâng Khu tơrŭm cheăng ton xŏn dêi pó; ki rơhêng vâ tối phiu ro ‘na mâu tơdroăng châ tơƀrê mơnhông mơdêk cheăng kâ – rêh ối pơlê pơla dêi tơnêi têa tung pơla kố nah, ki rơhêng vâ tối cho pro tơniăn ƀă mơnhông mơdêk cheăng kâ - rêh ối pơlê pơla klêi kơ’nâi pơreăng kân COVID-19, pơtối mot tơrŭm lâp plâi tơnêi trâu hơngế, mơdêk tíu cheăng, ki loi tơngah tung lâp plâi tơnêi.

Mơnhên cho khu ki kal ôh tá păng klâ krê dêi pơlê pơla hdroâng mơngế Việt Nam môi Đảng, Tơnêi têa hiăng mơnhên, kuăn pơlê pin ki rêh ối a kong têa ê pói vâ châ veăng kum hên tâ mê nếo ăm tơdroăng mơjiâng tơnêi têa ƀă tơbêng tơrŭm cheăng Việt Nam - Mih, pôa Phạm Minh Chính tối, tung tơdroăng mơnhông tơrŭm cheăng Việt Nam – Mih, pơlê pơla mơngế Việt Nam rêh ối a kong têa Mih tối tơdjuôm ƀă kuăn pơlê a California tối krê ai veăng kum kal khât, Ngế pro xiâm hnê ngăn tơnêi têa tối rơdêi, Đảng, Tơnêi têa đi đo tơmâng troh mơngế Việt Nam a kong têa ê, pói vâ tung la ngiâ, pơlê pơla mơngế tê mơdró, mâu khu ki rơkê, khu cheăng khoa hok mơngế Việt Nam a kong têa Mih kô pơtối rơtế tơdroăng mơnhông mơdêk dêi tơnêi têa.