A chôu phut koh tơdah mê, pôa Lan Szymon Holownia hiăng kơdeăn khĕn ‘ló khât hneăng lăm pôu dêi pôa Phạm Minh Chính, ngăn kố cho hdró tơdroăng ki kal tung tơrŭm cheăng pơla Việt Nam ƀă Ba Lan tung pơla hơnăm kố, péa pâ kong têa koh tơbâ 75 hơnăm tơrŭm cheăng tơpui kâ (1950-29025).

Pôa Phạm Minh Chính, Ngế pro xiâm hnê ngăn Chin phuh hiăng mơnê ƀă koh tơdah kal khât ƀă ai tuăn ƀriê pâ ki pôa Lan Szymon Holownia rơtế ƀă mâu kăn Kuô̆k hô̆i hiăng trâm mâ, tơpui tơno ƀă khu kăn xiâm dêi Việt Nam; vêh mơnhên ki xiâm dêi hneăng lăm pôu mê cho thăm rế vâ mơdêk hên ó tâ nếo tơrŭm cheăng tiô khôi hmâ ƀă tơrŭm hên kơvâ cheăng ăm thăm krá lĕm, tơdrêng amê, thăm mơdêk tơrŭm krá kâk pơla peá khu hdroâng mơngế Việt Nam ƀă Ba Lan.

Tối nhên, ki kal dêi tơdroăng tơrŭm tung tê mơdró kâ, mơ’no liăn cheăng tung tơrŭm pơla péa pâ tơnêi têa, pôa Phạm Minh Chính prế pôa Lan Szymon Holownia vâ môi tuăn thăm mơdêk hên ó tâ nếo tung tơrŭm cheăng tơxâng ƀă tơdroăng ki tơrŭm cheăng kal kí ƀă túa lĕm tro pơla péa pâ tơnêi têa, vâ moi tuăn khŏm tơrŭm tê mơdró kâ tâk tro 5 rơtal USD Mih.

Xuân tung hâi ki mê, pôa Phạm Minh Chính hiăng tơdah mâu kăn pơkuâ ngăn ‘na mơdró kâ ki xiâm dêi kong têa Ba Lan, tung mê ai ta Grup Adamed ƀă Khu xiâm rak ngăn ‘na tơƀai LOT Airlines, thăm mơdêk tơrŭm pêi cheăng kâ ƀă mơ’no liăn mơnhông tê mơdró kâ pơla péa pâ tơnêi têa.

Hdrối mê, kơxo lơ 17/1, pôa Phạm Minh Chính, Ngế pro xiâm hnê ngăn tơnêi têa hiăng troh lăm pôu ƀă ai ƀai xông tơpui ki kal a Đăi hok Tổng hơp Warsaw, Ba Lan. Ƀai xông tơpui dó inâi: ‘’Djâ tơrŭm cheăng Việt Nam – Ba Lan tơmiât troh a’ngêi tâ, xua hơniâp lĕm ƀă mơnhông dêi péa kơpong Đông Nam Á ƀă Trung Đông Âu’’.

Hngêi trung Đăi hok Tổng hợp Warsaw cho um mơhno ăm tơdroăng tơrŭm krá tơniăn pơla Việt Nam ƀă Ba Lan tung kơvâ hnê hriâm. Hrĭng sinh viên ƀă kăn ƀô̆ Việt Nam hiăng ƀă dế tiô hriâm a Hngêi trung. Hên ngế nôkố cho mâu yăo sư, ngế cheăng khoa hok má môi tung hên kơvâ. Tối ‘na troăng tơmiât pêi la ngiâ ‘na tơrŭm cheăng Việt Nam – Ba Lan, Ngế pro xiâm hnê ngăn tơnêi têa mơnhên, Việt Nam nhuô̆m ƀă pói vâ mơdêk, pro trâu hơngế tâ nếo tơrŭm cheăng tâi tâng ƀă mâu kong têa Trung Đông Âu, ki rơhêng vâ tối cho ƀă mâu kong têa pú hmâ tiô khôi vâi krâ nah môi tiah Ba Lan. Ngế pro xiâm hnê ngăn tơnêi têa tối ‘na 6 tơdroăng mơnhông châ tơƀrê djâ tơrŭm cheăng Việt Nam – Ba Lan to a râ a’ngêi nếo.