Kơxê lơ 19/9, tiô chôu kong têa, a Viê̆n Hòa bình Mih, pôa Phạm Minh Chính, Ngế pro xiâm hnê ngăn Chin phuh ƀă khu kăn xiâm Việt Nam hiăng veăng a Leh tơbâ 78 hơnăm mơjiâng tơnêi têa Kŏng hòa xah hô̆i chuh ngiah Việt Nam ƀă koh tơbâ tơrŭm cheăng tơnêi têa tơrŭm cheăng tung la ngiâ tâi tâng Việt Nam – Mih xua kăn teăng mâ Việt Nam a Washington DC tơkŭm po.

Tơpui a rôh leh, mâu kăn Mih koh hâk pôa Phạm Minh Chính, Ngế pro xiâm hnê ngăn Chin phuh ƀă khu kăn xiâm Việt Nam troh a Mih ƀă ai mâu tơdroăng cheăng pêi pơla péa tơƀrê, ai pơxúa. Peăng Mih tối nhên ai tơdroăng ki môi tuăn dêi péa đảng Dân chủ ƀă Kŏng hòa tung tâi tâng mâu kơvâ cheăng pơkuâ ƀă Kuô̆k hô̆i ngăn nhuô̆m tơrŭm ƀă Việt Nam, môi tuăn bă Việt Nam “rơdêi, tơniăn krê, mơdrŏng ƀă mơ-eăm xêh”.

Pôa Phạm Minh Chính, Ngế pro xiâm hnê ngăn tơnêi têa hiăng tối tung rôh lăm pôu hiăng ai hên rôh pêi cheăng, tơpui tơno ƀă mâu kong pơlê ƀă khu mơdró kâ Mih, malối tơdjâk troh kơvâ cheăng ƀă kơmăi kơmok, bán dẫn. Ngế pro xiâm hnê ngăn tơnêi têa tối phiu ro hlo mâu tơdroăng ki khŏm mơ-eăm dêi mâu khu mơdró kâ kân dêi Mih pơtối po rơdâ ‘no liăn cheăng, tơrŭm ƀă Việt Nam ƀă môi tuăn tiah kố péa pâ kal mơdêk rơdêi tơdroăng ki tơbleăng tung tơdroăng ki ai khât vâ rĕng bro mâu rôh tơ’lêi chiâng pêi pro.