Tơpui a rôh po tơdroăng, teăng mâ Chin phuh, pôa Phạm Minh Chính, Ngế pro xiâm hnê ngăn tơnêi têa tơmâng xo, khĕn kơdeăn ƀă rơkâu mâu tơdroăng ki ƀlêi chiâng ki kal ki Đảng ƀô̆, khu kăn pơkuâ, khu lêng ƀă kuăn pơlê kong pơlê Đồng Nai hiăng pêi châ tung pơla hdrối nah. Ngế pro xiâm hnê ngăn tơnêi têa mơnhên tối, túa pơkâ kong pơlê Đồng Nai hiăng châ hbrâ rơnáu krâu, rơkê; mơjiâng tung tơdroăng mơdêk ki ai hlâu phá tơviah, rôh tơ’lêi ki xiâm, pơxúa tơxup tơbriât, xuân môi tiah ‘mâi mơnhông mâu tơdroăng ki tá hâi pêi pro klêi, ối ‘ro dêi kong pơlê.

Túa pơkâ hiăng ai tơmiât, troăng ngăn, tơdroăng vâ pêi mơnhông ki kal, ki tơƀrê mơnhông; ai troăng hơlâ kơjo gum, po troăng ăm Đồng Nai tung um kơchuâ tơdjuôm dêi kong pơlê, pơlê kong kân tung lâp tơnêi têa. Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng pơtối tơrŭm pêi pro tơƀrê túa pơkâ kong pơlê Đồng Nai; rơtế ƀă mâu kong pơlê ki ê tung lâp kơpong mơdêk ivá rơdêi tơkŭm tung pêi pro tơƀrê túa pơkâ.