Drêng troh tơbâ 94 hơnăm hâi mơjiâng Đoân Droh rơtăm Kŏng san Hồ Chí Minh (26/3/1931 – 26/3/2025), kơmăng hâi lơ 23/3, a Hà Nội, pôa Phạm Minh Chính, Ngế pro xiâm hnê ngăn Chin phuh veăng Leh mơhá pri ăm mâu hơnăm ối nếo Việt Nam kơhnâ rơkê  hơnăm 2024, pơxá  “Tơdroăng  rêh ối rơkê plĕng’’ xúa Khu xiâm Đoân Đroh rơtăm Kŏng san Hồ Chí Minh, liăn ‘măn kơdĭng gum mơngế ki rơkê hơnăm ối nếo Việt Nam, Tíu mơ’no Rơ’jíu Um tơvi Việt Nam tơrŭm ƀă tơkŭm po.

Hơnăm 2024, Khu tơkŭm mơhá pri hiăng châ xo 159 hồ sơ tíu pêi cheăng tung lâp tơnêi têa. Hô̆i đong mơhá pri hiăng tăng hlo 10 ngế  hơnăm ối nếo kơhnâ rơkê ƀă 8 ngế hơnăm ối nếo Việt Nam tơngah ai hnoăng cheăng pêi tơƀrê, rơkê tung mâu tơdroăng: Hriâm tâp; tăng ‘nâi plĕng khoa hok - hriăn plĕng ki nếo; Pêi chiâk deăng; tê mơdró - pơxiâm pêi cheăng, ‘na cheăng lêng; kring tơniăn, Pơtâp ivá; Pêi cheăng ‘na pơlê pơla; Túa lĕm tro hơdruê xuăng; Rak ngăn tơdroăng cheăng Tơnêi têa hiăng châ pơ-eăng.

Pôa Phạm Minh Chính, Ngế pro xiâm hnê ngăn tơnêi têa phiu ro veăng leh pơ-eăng tuăn ngôa rơkê mâu hơnăm ối nếo, mâu ngế ki kal tung la ngiâ dêi tơnêi têa, ƀă tơdroăng cho mâu ngế ki xông rơdêi, mâu ngế ki djâ troăng ahdrối ƀă ing tuăn vâ dêi “Hơnăm ối nếo Việt Nam hâk tơngăm, loi khât tiô Đảng, Tơnêi têa xông rơdêi a chal nếo. Ngế pro xiâm hnê ngăn tơnêi têa púi vâ Droh rơtăm Việt Nam thế tơmâng tơkŭm pêi tơdâng tơ’mô, rơkê plĕng tung pơlê pơla, tơniăn rêh ối pơlê pơla, mơnhông tơdroăng rêh ối dêi kuăn pơlê, mê cho pơhlêh troăng hơlâ, luât pơkâ dêi Đảng Tơnêi têa ‘na tơdroăng rêh ối pơlê pơla, malối cho oh tá pơrah ‘na hnê hriâm, pơkeăng pơlât a rêm tíu tung lâp tơnêi têa, troh ƀă tơrêm  pơlê pơla, rêm rơpŏng ƀă rêm ngế kuăn pơlê, malối kơpong kong ngo, ki ối hơngế hơngó, tíu tơkăng kăng, rơlố têa ƀă hiâm tuăn tơmiât “Ôh tá lôi ngế ki lâi  pá rŏng”.