Tối tơbleăng a rôh Leh mơhnhôk, pôa Phạm Minh Chính, Ngế pro xiâm hnê ngăn Chin phuh tối nhên: Tơdroăng mơhnhôk hriâm "Bình dân học vụ số" ai pơxúa kân ƀă lĕm tro ƀă tơdroăng mơnhông tơnêi têa, mơhno ki mơ-eăm khât dêi Đảng, Tơnêi têa tung mơnhông Chin phuh kơxô̆, cheăng kâ kơxô̆, kuăn pơlê kơxô̆ rơkê plĕng, ƀă lĕm tro; pơtối rak vế tơdroăng hâk vâ hriâm, hâk vâ hriâm kơ-êng, ing tuăn vâ hriâm plâ rơxông dêi hdroâng mơngế Việt Nam.

Tơbâ 80 hơnăm, drêng tơnêi têa châ tơleăng lĕm lối 95% pơ’leăng mâ mơngế hâi teăm chiâng pơchuât, hâi chiâng chêh... Tơdroăng mơhnhôk “Bình dân học vụ số’’ pơxiâm ai ƀă tơdroăng pơkâ pêi tơdrêng cho xut tah mâu ôh tá ‘nâi chư, tơkéa vâ tối hnê ăm mâu ki oh tá ‘nâi chư, mơdêk hriâm tâp túa lĕm tro ăm kuăn pơlê ƀă bú tung iâ hơnăm, rơtuh ngế kuăn pơlê Việt Nam hiăng chiâng pơchuât, chiâng chêh, veăng ‘no hnoăng ki kal tung tơdroăng pêi cheăng mơjiâng ƀă kring vế Tơnêi têa, Ngế pro xiâm hnê ngăn tơnêi têa tối nhên, tơnêi têa dế pêi pro hên tơdroăng tơ’lêi vâ mot tung chal nếo, mơnhông rơdêi ƀă ivá xiâm lo ing khoa hok, kŏng ngê̆, pơhlêh nếo ƀă pơhlêh kơxô̆.