VOV4.Xơ Đăng - Tung pơla lăm pêi cheăng a Pơlê kong kân Cần Thơ, pôa Phạm Minh Chính, Ngế pro xiâm hnê ngăn ƀă khu kăn dêi Chin phuh hiăng lăm pôu ƀă pêi cheăng ƀă khu kăn xiâm Kŏng ti mơ’no on tơhrik kơxô̆ 2, Grup ngăn on tơhrrik Việt Nam. Klêi kơ’nâi hmâng mâu kăn tối ‘na tơdroăng pêi cheăng, tê mơdró, hnoăng cheăng pêi pro dêi mâu tơdroăng tơkêa bro ‘na on tơhrik, pôa Phạm  Minh Chính hiăng pơkâ thế Khu xiâm ngăn Kŏng ti kal hriăn plĕng mâu troăng hơlâ ki vâ pơtối rôe tơmeăm, kơmăi kơmok tiô chal nếo nôkố, ôh tá xê kơtâu ƀă on kơchâ hmốu xếo.

‘Na mâu tơdroăng tơkêa bro Tíu xiâm ngăn On tơhrik Ô Môn, mê Ngế pro xiâm hnê ngăn pơkâ thế Khu xiâm ngăn ‘na cheăng kơmăi kơmok ƀă tê mơdró, Grup ngăn on tơhrik Việt Nam - EVN, Grup pơkuâ ngăn têa châu têa kơxăng Việt Nam, dó inâi PVN tơrŭm cheăng pro ti lâi tâi tâng hyôh on ki mơ’no mê kal athế châ pêi mơjiâng hên vâ mâu Hngêi kơmăi on tơhrik Ô Môn I, II, III, IV pêi cheăng tơniăn.

Katarina Nga tơplôu ƀă tơbleăng