VOV4.Xơ Đăng - Kơxo lơ 4/7, ing pơkuâ dêi pôa Phạm Minh Chính, Ngế pro xiâm hnê ngăn Chin phuh, hiăng pơxiâm po Hneăng hôp mơ’no tơdrêng tung um tiô troăng hyôh măng Chin phuh ƀă mâu kong pơlê ƀă Roh hôp Chin phuh tiah hmâ khế 6 hơnăm 2022 ‘na tơdroăng cheăng kâ – rêh ối pơlê pơla khế 6 ƀă 6 khế hơnăm 2022. Xông tơpui a hneăng hôp, pôa Phạm Minh Chính tối ăm ‘nâi tơdroăng cheăng kâ – rêh ối pơlê pơla khế 6 ƀă 6 khế apoăng hơnăm tơtêk châ tơƀrê tung mâu kơvâ cheăng, ai kơvâ tơtêk păng ‘nâng, hlo nhên khât.

Tâ tá rôh hôp

Tơdroăng cheăng kâ kân tơniăn, tơdroăng liăn chu rơpâ yă châ mơdât mơhé hên tơdroăng ki pro pá, ki má lối cho yă têa châu, têa kơxăng to kơnâ, mâu tơdroăng tơdâng kân châ tơniăn xo hnoăng liăn – mơ’no liăn cheăng, tê rôe tơmeăm ngi kong têa ê, tơdroăng hên mơngế pêi cheăng ƀă tơdroăng kal vâ mơngế pêi cheăng, on tơhrik, on gas ƀă tơmeăm kâ.

Ngế pro xiâm hnê ngăn tơnêi têa tối rơdêi, mâu tơdroăng châ tơƀrê cho xua tơdroăng pơkuâ rơkê dêi Khu xiâm pơkuâ Đảng, Khu xiâm kal kí, Khu pơkuâ hnê ngăn cheăng Đảng, Kăn xiâm ối a ko cho pôa Nguyễn Phú Trọng, Kăn xiâm pơkuâ hnê ngăn Đảng, rơtế mâu pơkâ troăng hơlâ ki kal dêi Tơnêi têa, tung mê, ai mâu pơkâ dêi Kuô̆k hô̆i; tơdroăng hnê mơhno, pơkuâ kơtăng, ó rơdêi, ai xiâm kối dêi Chin phuh, Ngế pro xiâm Chin phuh, tơdroăng mơ-eăm dêi tá khu cheăng kal kí rơtế mâu khu tê mơdró, tơdroăng môi tuăn dêi kuăn pơlê dêi lâp tơnêi têa ƀă tơdroăng tŏng kum dêi pú hmâ lâp plâi tơnêi.

A Sa Ly tơplôu ƀă tơbleăng