VOV4.Xơ Đăng - Kơxê kố, lơ 15/7, pôa Phạm Minh Chính, Ngế pro xiâm hnê ngăn tơnêi têa hiăng troh têk nhang a Tíu koh tơbâ Pôa Hồ ƀă tơbâ mâu ngoh khên tơnôu Mô đô̆i hlâ tung tơplâ xâ cheăm Hiệp Hưng, tơring Phục Hiệp, kong pơlê Hậu Giang. Pơtối mê, Ngế pro xiâm hnê ngăn tơnêi têa ƀă khu râ kăn pêi cheăng lăm séa ngăn tơnêi tơníu a Kơpong rak vế loăng pơlái kong kế tơnêi tơníu têa lân Lung Ngọc Hoàng ối tung tơring Phụng Hiệp.

Ngế pro xiâm hnê ngăn tơnêi têa séa ngăn kơpong rak vế loăng pơlái kong kế kơpong Rak vế Lung Ngọc Hoàng

Kơbong rak vế tơmeăm Lung Ngọc Hoàng – tíu rak vế nhâ loăng pơlái kuăn kiâ ki má môi lâp tơnêi têa nôkố, châ tối cho ‘’xôu ngiât’’ dêi tơbăng kroăng Cửu Long. Klêi kơ’nâi tơmâng tơbleăng ƀă séa ngăn kơpong tơnêi tơníu, Ngế pro xiâm hnê ngăn tơnêi têa pơkâ thế kong pơlê ti tăng khu mơ’no liăn cheăng ki ai ivá, rơkê tung pêi cheăng vâ mơnhông mơdêk, xúa mâu tơmeăm tung kong kế dêi Kơpong rak vế tơmeăm loăng pơlái kong kế kuăn kiâ kong vâ mơnhông mơdêk ôm hyô ngăn loăng pơlái kong kế a mâu kơpong tiô pơkâ dêi luât. Khu râ kăn pơkuâ mâu râ mơhnhôk kuăn pơlê veăng pêi tơtro tơdroăng rak vế loăng pơlái kong kế, rak vế mâu kuăn kiâ kong ki kơnía.

A Sa Ly tơplôu ƀă tơbleăng