VOV4.Xơ Đăng - Kơxê lơ 26/6, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah yăo sư Stewart Cole, Kăn hnê ngăn Viện Pasteur Paris dế ai rôh lăm pôu, pêi cheăng a Việt Nam. A rôh tơdah, Ngế pro xiâm hnê ngăn tơnêi têa tối nhên khăm pơlât cho kơvâ cheăng ki tơrŭm khôi hmâ tơniăn lĕm, môi tung mâu tơdroăng ki tơchĕng tơmiât rơkê veăng kum mơdêk tâ nếo tơrŭm cheăng tung la ngiâ Việt Nam ƀă Pơhlăng rế hía rế mơnhông.

Pôa Phạm Minh Chính, Ngế pro xiâm hnê ngăn tơdah kăn xiâm hnê ngăn Viện Pasteur Paris

Ngế pro xiâm hnê ngăn tơnêi têa tối nhên, tơrŭm cheăng pơla Viện Pasteur Pơhlăng ƀă mâu Viện Pasteur a Việt Nam châ ngăn cho tơdroăng ki pơkâ ƀă xuân cho tơdroăng ki tối nhên tung tơrŭm cheăng pơla péa tơnêi têa. Ngế pro xiâm hnê ngăn tơnêi têa mơnê Viện Pasteur hiăng tŏng kum mâu tơdroăng ki kơnía git ăm mâu Viện Pasteur dêi Việt Nam tung plâ hdrối kố nah, malối cho kơxô̆ liăn kum vâ mơdêk ivá hriăn ngăn, séa ngăn SARS-CoV-2 ƀă tâi tâng kơlo ‘no lối 10 rơtal liăn.

Katarina Nga tơplôu ƀă tơbleăng