VOV4.Xơ Đăng - Kơxê lơ 1/6, pôa Phạm Minh Chính, Ngế pro xiâm hnê ngăn tơnêi têa hiăng tơdah pôa Khamphan Phommaphat, ngế cheăng tung khu xiâm kal kí, Ngế xiâm séa ngăn mâu tơdroăng tơnêi têa Lếo lăm pôu, pêi cheăng hlối tơpui mâu tơdroăng tơrŭm ƀă khu séa ngăn dêi Chin phuh Việt Nam. Ngế pro xiâm hnê ngăn tơnêi têa tối nhên tơdroăng tơrŭm cheăng pơla Việt Nam - Lếo cho tơdroăng tơrŭm ki kal, ôh tá la lâi pơtê, kum dêi rơpó ƀă hlối mơnhông tơ-ƀrê; mơhno tung tŭm mâu tơdroăng pá puât hliăng tiâ ki lâi, Việt Nam đi đo  nhoăm tơdroăng tơrŭm cheăng ƀă Lếo, đi đo pêi tâi ivá tơná vâ mơdêk rơdêi tơrŭm cheăng nhŏng o ki hmâ, tơrŭm krá kâk, tơ-ƀrê tung tâi tâng mâu tơdroăng.

Pôa Phạm Minh Chính, Ngế xiâm hnê ngăn tơnêi têa tơdah Kăn xiâm séa ngăn Tơnêi têa Lếo

Ngế pro xiâm hnê ngăn tơnêi têa khĕn kơdeăn khât tơdroăng hôp tơpui tơno pơla khu kăn Séa ngăn dêi tơnêi têa Lếo ƀă Khu kăn Séa ngăn Chin phuh Việt Nam; hnối tối, Chin phuh Việt Nam mơhnhôk pro tơ’lêi hlâu vâ péa pâ mơdêk tơrŭm cheăng ‘na séa ngăn, tơleăng mơnhên săm phoăng ƀă hbrâ mơdât kâ kơluâ; hbrâ tŭm tơdroăng vâ Khu Séa ngăn Chin phuh Việt Nam tơkŭm po lâm hnê ăm mâu kăn ƀô̆ tiô pơkâ dêi Khu séa ngăn tơnêi têa Lếo.

Gương tơplôu ƀă tơbleăng