A chôu phut tơdah mê, pôa Phạm Minh Chính vêh mơnhên, Việt Nam đi đo ngăn kong têa Nhuk cho pú hmâ ki loi tơngah, ki kal má môi ƀă ton xŏn. Péa Ngế kăn xiâm tơnêi têa tối, tơrŭm cheăng krá tơniăn ton, trâu hơngế pơla Việt Nam ƀă Nhuk dế tung tơdroăng ki mơnhông tơniăn lĕm, ó rơdêi ƀă ki păng ‘nâng tung hên kơvâ cheăng.

Pôa Phạm Minh Chính hiăng pâ thế péa pâ pơtối ‘mâi mơnhông tơdroăng ki loi tơngah dêi pó tung hnoăng pơkuâ ngăn cheăng kal kí, kơnôm ing mâu tơdroăng ki lăm pôu, trâm mâ pơla mâu kăn xiâm, mâu ngê xiâm, mâu kơvâ cheăng; thăm mơdêk tơrŭm cheăng trâm dêi pó, pro nhŏng o pơla mâu kong pơlê, pơlê kong kân, khu mơdró kâ; thăm mơdêk tơrŭm pơla mâu kuăn pơlê, tung mê, peăng kong têa Nhuk tŏng kum, ngăn khât tơdroăng ki pro hlâu iâ ‘na theh visa drêng mot lo troh a kong têa dêi pó, kum ăm Việt Nam ôh tá eâ ai visa vâ châ mot pêi cheăng a kong têa Nhuk vâ thăm mơdêk tơrŭm cheăng ôm hyô, tơrŭm tơpui kâ, pêi cheăng pơla kuăn pơlê; ing mê, pro tơ’lêi hlâu ăm vâ chê 500 rơpâu ngế Việt Nam a kong têa Nhuk ki dế rêh ối, hriâm tâp ƀă pêi cheăng.