VOV4.Xơ Đăng - Tung rôh hôp tơbleăng tiah hmâ dêi Khu xiâm tơpui kâ po a kơxê lơ 21/4, jâ Lê Thị Thu Hằng, ngế cheăng ăm Khu xiâm tơpui kâ ăm ‘nâi, pôa Phạm Minh Chính, Ngế pro xiâm hnê ngăn tơnêi têa kô pơkuâ djâ khu kăn Việt Nam veăng hôp a rôh hôp Khu kăn xiâm pơla Mih – ASEAN a Washington a khế 5 la ngiâ. Drêng kố, pôa Phạm Minh Chính kô pôu, pêi cheăng a Mih ƀă Khu lâp kong têa.

Pôa Phạm Minh Chính, Ngế pro xiâm hnê ngăn tơnêi têa kô veăng hôp a rôh hôp khu kăn xiâm ASEAN – Mih  a khế 5

Klêi kơ’nâi lối 27 hơnăm mơjiâng tơrŭm cheăng tơpui kâ, tơrŭm cheăng pơla Việt Nam prếi Mih hiăng hlo tơniăn ton xŏn, tung tơdroăng ki péa pâ rơtế ai pơxúa, loi nhuô̆m tơniăn krê hnoăng pơkuâ ƀă tâi tâng tơnêi tơníu ƀă troăng hơlâ kal kí dêi rơpó. Tung tơdroăng mê, Việt Nam rơhêng vâ ƀă hbrâ rơnáu tơrŭm ƀă khu kăn pơkuâ dêi pôa Joê Biden, kăn xiâm pơkuâ kong têa vâ mơdêk tơrŭm 2 tơnêi têa pơtối mơnhông trâu hngế, tơƀrê ƀă krá tơniăn ton, xua hơniâp lĕm tơniăn tơrŭm ƀă mơnhông dêi kơpong ƀă tung lâp plâi tơnêi.

Katarina Nga tơplôu ƀă tơbleăng