Drêng ai tơnêi tơhnah tơhnâp hên ó a mâu kong pơlê, tung hneăng lăm pôu pêi cheăng a kơpong Tơbăng kroăng Cửu Long, peăng xêi hâi lơ 11/8, pôa Phạm Minh Chính, Ngế pro xiâm hnê ngăn Chin phuh rơtế ƀă mâu kăn tung Chin phuh ƀă Kăn pơkuâ hnê ngăn Đảng 3 kong pơlê Cà Mau, Sóc Trăng, Bạc Liêu lăm mơnhên ngăn, séa hlo, vâ tối ‘na tơdroăng ki tơnêi tơhnah tơhnap ki ó a rơhê têa kroăng, kĭng têa kơxĭ, xua pơla hdrối kố nah tơdroăng ki tơnêi tơhnah tơhnâp hlo rế hía rế ó păng ‘nâng.

Klêi kơ’nâi lăm hlo ngăn tiah mê, pôa Phạm Minh Chính rơtế ƀă mâu kăn cheăng tung Chin phuh hiăng ai roh hôp vâ mơnhên tối tơdroăng ki tơnêi, rơhê tơhnah tơhnâp ƀă tơdroăng ‘mâi rơnêu a rơhê têa kroăng, kĭng têa kơxĭ dêi mâu kong pơlê kố. Xông tơpui a roh hôp ƀă 3 kong pơlê, pôa Phạm Minh Chính hiăng pơkâ thế, ki ahdrối tâ, mâu kong pơlê kố athế hbrâ rơnáu dêi xêh tung tơdroăng kring vế, rak ngăn tơniăn ăm mâu rơpŏng kuăn pơlê ki rêh ối achê tíu ki tơhnah tơhnâp, ăm kuăn pơlê châ rêh ối pơtân a tíu ki tơniăn lĕm.

Pơtối ăm thế mâu rơpŏng ki ối achê rơhê, kĭng têa kơxĭ ki ôh tá tơniăn rĕng châ djâ lăm rêh ối a tíu ki tơniăn lĕm vâ pôi tá ai tơdroăng xía vâ ‘na kuăn mơngế ƀă kế tơmeăm. Pôa Phạm Minh Chính pơkâ thế mâu kong pơlê, pơlê kong kân, tơring, cheăm kơvâ cheăng kal athế hriăn tí tăng ‘nâi nhên ‘na tơdroăng xía vâ a rơhê têa kroăng, kĭng têa kơxĭ vâ ai troăng hơlâ hnê tối, pơkâ teăm tơdrêng, tah lôi tơdroăng ki tơvâ tơvân, mơnhêa mơnhĕn, ƀă pơcháu hnoăng cheăng athế pêi pro kơhnâ khât ‘na hnoăng cheăng mê, hnối kring vế tơniăn châ tơƀrê, tơtro khât ƀă tơdroăng ki ai păng ‘nâng; rĕng teăm tối tơbleăng, pơkâ pêi pro tiô hnoăng cheăng ki râ kơpêng hiăng pơcháu vâ ga tơtro ƀă hnoăng cheăng ki tơniăn tung rak vế tơdroăng rêh ối, kế tơmeăm dêi kuăn pơlê.