Ngế pro xiâm hnê ngăn tối, luâ 48 hơnăm mơjiâng, xông tơƀrê, Hok viê̆n hnê cheăng lêng hiăng pêi tơƀrê hên tơdroăng ki kal, mê cho: pêi tro tơdroăng tăng ‘nâi plĕng mâu tơdroăng ‘na lêng, lêng tơplâ kring gak tơkăng kong, mơjiâng khu Lêng.

‘Na tơdroăng cheăng pêi ki kal tung la ngiâ, Ngế pro xiâm hnê ngăn tơnêi têa pơkâ thế Hok viê̆n hnê cheăng lêng tăng ngăn vâ ‘nâi nhên, ‘nâi tro khât, ‘nâi ‘ló tŭm tơdroăng, teăm tơdrêng tung tơdroăng nôkố ƀă tung lâp plâi tơnêi, tung kơpong vâ tăng ‘nâi plĕng tối ăm Đảng, tơnêi têa ‘na troăng hơlâ vâ pêi ki lâi cho khu tơrŭm, ki lâi cho ngế ki kal, vâ pôi tá kơdrâ ‘na troăng hơlâ pêi pro; Pêi tro tơdroăng tăng ‘nâi plĕng; tơmâng khât tung tơdroăng mơgêi, tăng ngăn, pê klêi tơdroăng tơpui kâ, khoa hok, ngê̆ thuâ̆t ‘na lêng, mâu lêng kring gak tơkăng kong; mơdêk rơdêi ki tơƀrê tung tăng ‘nâi plĕng mâu tơdroăng, tối hdrối tro mâu tơdroăng, vâ ai troăng hơlâ mơnhông mơdêk tơnêi têa, la thế rak ki tơniăn krê, pơkuâ dêi.

Pakĭng mê, mơdêk tăng ‘nâi plĕng, tối ‘na mâu troăng rơhlâ mơnhông cheăng kâ rêh ối vâ chê ƀă tơdroăng pro tơniăn cheăng lêng ‘na kring gak tơkăng kong, kring vế tơniăn ƀă tơpui kâ.