VOV4.Xơ Đăng - Kơxê lơ 1/7, tung tơdroăng pêi cheăng a Dak Lak, pôa Phạm Minh Chính, Ngế pro xiâm hnê ngăn Chin phuh hiăng troh lăm pôu, pêi cheăng, mơhnhôk kăn ƀô̆, mâu mô đô̆i ối tung Khu pơkuâ hnê mơhno lêng kong pơlê Dak Lak ƀă Kŏng an kong pơlê Dak Lak. Xông tơpui a roh pêi cheăng, Ngế pro xiâm hnê ngăn tơnêi têa pơkâ Khu xiâm pơkuâ lêng kong pơlê Dak Lak kal hlê plĕng tŭm, pêi pro kơtăng pơkâ Đảng pơkuâ tâi tâng, tơdrêng, tŭm tơdroăng ƀă Khu lêng kuăn pơlê, pêi tiô tơdroăng pơkuâ dêi Tơnêi têa, rak tơrŭm achê ƀă kuăn pơlê.

Pôa Phạm Minh Chính-Ngế pro xiâm hnê ngăn CHin phuh tơpui tơno ƀă kh lêng dêi kong pơlê Dak Lak

Rơtế amê, thế ‘nâi tơdroăng vâ tơbleăng ăm khu râ kăn pơkuâ hnê ngăn cheăng Đảng, khu râ kăn pơkuâ, ôh tá ăm ai tơdroăng pêi ôh tá tiô tơná vâ, kơdrâ ƀă tơdroăng ki trâm ôh tá ƀĕng ê; đi đo hbrâ tơplâ a kơlo kân má môi, gak kring krá tơniăn tơdroăng tơniăn krê, hnoăng pơkuâ, tâi tâng tơnêi tơníu, pơxúa tơnêi têa, hdroâng mơngế, hbrâ lăm a hên tíu, kêi đeăng hnoăng cheăng ki Đảng ƀă Tơnêi têa pơcháu. Ngế pro xiâm hnê ngăn tơnêi têa pơkâ thế khu râ kăn pơkuâ hnê ngăn cheăng Đảng, khu râ kăn pơkuâ mâu râ pơtối tơmâng tŏng kum, pro tơ’lêi hlâu ăm khu lêng kuăn pơlê, Kŏng an kuăn pơlê mâu râ pêi pro tơtro hnoăng cheăng châ pơcháu.

A Sa Ly tơplôu ƀă tơbleăng