Kơxê măng lơ 11/10, tơƀai pơto pôa Phạm Minh Chính, Ngế pro xiâm hnê ngăn Chin phuh rơtế khu râ kăn xiâm Việt Nam veăng Hneăng hôp Khu râ kăn xiâm ASEAN roh má 44, 45 ƀă mâu Hneăng hôp khu râ kăn xiâm ki tơdjâk a Vientiane, kong têa Lếo, sap ing hâi lơ 08 troh hâi lơ 11/10/2024 hiăng vêh tơnêi têa, mơgêi roh lăm pôu pêi cheăng lĕm tro.

Tung 4 hâi Hôp ai vâ chê 20 tơdroăng pêi, lối 30 Ngế kăn pơkuâ mâu kong têa kơpong ASEAN ƀă khu ki veăng, dâng 90 mơ-éa ki kal châ tơbleăng ăm pêi pro ƀă mơnhên. Ƀă tơdroăng pêi cheăng hên, đi đo tung 4 hâi, Ngế pro xiâm hnê ngăn Chin phuh ƀă mâu ngế pêi cheăng tung khu hiăng veăng lối 60 tơdroăng pêi cheăng tá péa pâ ƀă hên pâ, mơnhên um méa ki hbrâ, thăm pêi pro ƀă pôu râng hnoăng cheăng dêi Việt Nam, tơdrêng amê gum mơdêk tơrŭm cheăng dêi Việt Nam ƀă mâu khu tơrŭm cheăng.

Hneăng hôp Khu râ kăn xiâm ASEAN roh má 44, 45 ƀă mâu Hneăng hôp ki tơdjâk hiăng châ tơƀrê, mơgêi hơnăm Kăn xiâm hnê ngăn ASEAN 2024 dêi Lếo. Pôa Phạm Minh Chính, Ngế pro xiâm hnê ngăn tơnêi têa hiăng ai roh trâm mâ ƀă Ngế pro xiâm hnê ngăn kong têa Lếo ƀă Ngế pro xiâm hnê ngăn kong têa Kul; môi tuăn pơtối tơrŭm djâ tơrŭm cheăng pái kong têa rế hía rế păng ‘nâng ƀă châ tơƀrê, tơxâng tơdroăng kal vâ dêi pái tơnêi têa ƀă tơtro ƀă tơdroăng kal vâ mơnhông tung hneăng nếo.