VOV4.Xơ Đăng - Kơxê lơ 10/7, pôa Phạm Minh Chính, Ngế pro xiâm hnê ngăn Chin phuh hiăng pêi cheăng ƀă Khu pơkuâ cheăng Đảng pơlê kong kân Cần Thơ ‘na tơdroăng po rơdâ pêi pro Pơkâ dêi Khu xiâm kal kí ‘na mơjiâng ƀă mơnhông mơdêk Pơlê kong kân Cần Thơ troh hơnăm 2030, tơmiât pêi troh hơnăm 2045; Pơkâ dêi Kuô̆k hô̆i ‘na mơnúa pêi pro mâu troăng pơkâ pêi, troăng hơlâ ki phá tơ-ê mơnhông mơdêk pơlê kong kân Cần Thơ.

Tâi tâng a roh pêi cheăng

Xông tơpui a roh pêi cheăng, pôa Phạm Minh Chính tối nhên, mơhé châ tơƀrê kal păng ‘nâng, laga Cần Thơ ối ai mâu tơdroăng tơvâ tơvân, pá puât môi tiah: Tá hâi khŏm mơ-eăm păng ‘nâng, mơ-eăm tá hâi kân tung hnê mơhno pơkuâ xua mê tá hâi mơnhông mơdêk, kal mơ’no liăn cheăng tro tơdroăng; Mơnhông mơdêk cheăng kâ tá hâi tơxâng ƀă tơmeăm ki ai hlâu, tơdroăng ki tơ’lêi pêi.

Ngế pro xiâm hnê ngăn tơnêi têa pơkâ, khu râ kăn pơkuâ pơlê kong kân Cần Thơ hnê mơhno mâu khu cheăng, kơvâ cheăng, mâu râ pơtối mơnhên, kheăn kơdeăn, mơnhên xiâm kối ki tơdjâk pa gong, ing tơná ƀă xo vêh túa ki rơkê tơtro tung tơdroăng pơkuâ vâ pêi tơtro tâ, châ tơƀrê tâ tung la ngiâ.

A Sa Ly tơplôu ƀă tơbleăng