VOV4.Xơ Đăng - Kơxê lơ 12/6, pôa Phạm Minh Chính, Ngế pro xiâm hnê ngăn Chin phuh pêi cheăng ƀă Khu pơkuâ cheăng Đảng kong pơlê Bắc Giang ‘na tơdroăng pêi pro, tơdroăng châ tơƀrê pêi pro Pơkâ Hneăng hôp XIII dêi Đảng ƀă Pơkâ Hneăng hôp XIX dêi Đảng ƀô̆ kong pơlê Bắc Giang. Klêi kơ’nâi tơmâng tơbleăng ‘na tơdroăng cheăng kâ - rêh ối pơlê pơla dêi kong pơlê, ki hên mâu kăn môi tuăn ƀă tơbleăng dêi kong pơlê ƀă mâu tơdroăng pâ thế pơkâ mơ’no.

Pôa Phạm Minh Chính, Ngế pro xiâm hnê ngăn Chin phuh pêi cheăng ƀă khu râ kăn pơkuâ kong pơlê Bắc Giang

Mơgêi roh hôp, pôa Phạm Minh Chính, Ngế pro xiâm hnê ngăn Chin phuh kheăn kơdeăn mâu tơdroăng châ tơƀrê ki khu râ kăn pơkuâ ƀă kuăn pơlê Bắc Giang hiăng châ tơƀrê tung pơla kố nah. ‘Na hnoăng cheăng troăng pêi la ngiâ Ngế pro xiâm hnê ngăn tơnêi têa tối nhên: Hlê plĕng tŭm, pêi pro châ tơƀrê Pơkâ Hneăng hôp XIII dêi Đảng ƀă Pơkâ hneăng hôp Đảng ƀô̆; xúa, pêi pro tro troăng pơkâ pêi dêi Đảng, troăng hơlâ luât dêi Tơnêi têa ƀă tơdroăng hnê mơhno pơkuâ dêi Chin phuh, Ngế pro xiâm hnê ngăn Chin phuh. Tơtrŏng mơgêi pơtân, mơgêi, kheăn kơdeăn túa pêi ki rơkê tơtro, mơnhông túa pêi ki rơkê, châ tơƀrê vâ pơtối po rơdâ mơjiâng troh lâp lu.

A Sa Ly tơplôu ƀă tơbleăng