Tối mơgêi a rôh hôp Ngế pro xiâm hnê ngăn tơnêi têa tối tơbleăng mâu tơmeăm ki ai hlâu ki rơdêi dêi kong pơlê ƀă tối nhên:  Đồng Tháp cho kong pơlê ai hên tơmeăm khoăng, ki rơdêi; ki tơngah dêi kong pơlê rế vâ mơhno hnoăng pêi ki kân, ki rơdêi, ki kal, cho tíu xiâm pêi chiâk deăng krá tơniăn, ton xŏn, djâ troăng a hdrối tung lâp tơnêi têa tung mâu tơdroăng pêi chiâk ki ai pơxúa môi tiah păn ká xi xŏng, pêt loăng plâi kâ, pêt báu klâng.

Ngế pro xiâm hnê ngăn tơnêi têa tối nhên, tung la ngiâ, Đồng Tháp kal tơkŭm mơdêk pái tơdroăng xiâm mơnhông tơƀrê (‘no liăn cheăng, rôe tơmeăm xúa, tê ăm kong têa ê); pêi lo hên kế tơmeăm tung kong pơlê ƀă tê tơmeăm ăm kong têa ê; mơdêk xo liăn ngân ‘no mơjiâng tơmeăm khoăng tơnêi têa; teăm tah ki xơpá, tơvâ tơvân, mơnhông pêi chiâk,  pê lo kế tơmeăm, tê mơdró.

Kong pơlê mơnhông ‘mâi hơ’lêh túa pro hlá mơ-éa, mâi hơ’lêh tơdroăng ‘no liăn mơjiâng tơmeăm khoăng tê mơdró; tơkŭm mơnhông pêi cheăng ƀă kơmăi kơmok uâ pơlê kế tơmeăm, pêi cheăng ƀă kŏng ngê̆ ki dâi lĕm, on tơhrik ‘mâi pro. Mơnhông pêi chiâk hưh cơ, krá tơniăn, xúa kŏng ngê̆ dâi lĕm, mơjiâng kơvâ cheăng ki xiâm, ai tơmeăm khoăng, kơjo kum tơrŭm pêi chiâk - tê tơmeăm pê lo ing chiâk deăng tiô troăng hyôh măng, tê mơdró ƀă điê̆n tưh. Mơnhông ôm hyô rơtế ƀă tơdroăng ton nah, khôi túa, vêa vong  tơtro ƀă tơdroăng ki ai hlâu, mâu tơmeăm ki ai akố.