Kơxo hâi lơ 29/12, pôa  Phạm Minh Chính - Ngế pro xiâm hnê ngăn tơnêi têa pơkuâ hôp Khu kăn hnê mơhno tơdroăng cheăng Chin phuh ‘na ‘’mơgêi pêi pro tơdroăng Pơkâ kơxô̆ 18 - NQ/TW. Tiô tối tơbleăng, tơdroăng xing xoăng tơkŭm rah mơngế pêi cheăng kal kí châ mâu Khu xiâm, kơ koan tơdâng Khu xiâm, kơ koan Chin phuh tơbleăng thế rĕng pêi, troh nôkố vâ tối hiăng pêi klêi tơdroăng tơkêa bro. Tiô tối hdrối khu kăn cheăng tung Chin phuh kô châ rah iâ mơngế ing 30 chu ối 21 tíu pêi cheăng xiâm mê cho: 13 khu xiâm, 4 kơ koan tơdâng Khu xiâm ƀă 4 kơ koan cho tung Chin phuh.  

A rôh hôp, Khu kăn hnê mơhno tơdroăng cheăng pêi tơkŭm séa ngăn mâu tơdroăng cheăng, tung mê tơkŭm tơpui tơno ‘na tơdroăng mơgêi tơdroăng cheăng dêi khu kăn pơkuâ hnê ngăn cheăng Đảng Chin phuh ƀă mơjiâng Đảng ƀô̆ Chin phuh dêi Tíu xiâm. Tối mơgêi hneăng hôp, pôa  Phạm Minh Chính - Ngế pro xiâm hnê ngăn tơnêi pơkâ thế séa ngăn, ‘mâi hơ’lêh, tơ’nôm tiô tơdroăng, ing tơdroăng xing xoăng khu kăn xiâm thế tơniăn, iâ mơngế, pêi cheăng rơdêi, tơdroăng cheăng pêi tơƀrê, pơxúa: tơdrêng ƀă kơdroh mơngế pêi cheăng, mơdêk hnoăng cheăng tơƀrê khât ăm mâu kăn pơkuâ, mơngế ki pêi cheăng.

Malối, tơdroăng xing xoăng tơkŭm khu kăn pêi cheăng thế kơdroh khu ki tơdế rá, kơdroh xiâm, la ôh tá tơvâ tơvân ôh tá tôi hnoăng cheăng pêi, hnoăng pơkuâ.