Ngế pro xiâm hnê ngăn tơnêi têa pơkâ thế, mâu kong pơlê mơ-eăm ngăn hnoăng cheăng ‘no liăn cheăng hngêi trăng troăng prôk a kong pơlê cho tơdroăng ‘no liăn ăm mơnhông, xua mê, athế kơdroh hâi khế, ivá vâ hnê mơhno; trâm mâ, mơhnhôk mâu khu ki ‘no liăn cheăng, tiâ mơnhên vâ pêi pro tro.

Ƀă mâu tơdroăng tơkêa bro troăng prôk Đông – Tây a mâu kơpong, kong pơlê mê athế rĕng tơbleăng. ‘Na tơdroăng tơkêa bro troăng prôk Dak Nông – Bình Phước mê athế rĕng tơbleăng vâ Dak Nông hluăn ing kơtiê ƀă Bình Phước athế bro kro mơdrŏng. ‘Na mâu hnoăng cheăng ki kal tung la ngiâ, Ngế pro xiâm hnê ngăn tơnêi têa tối nhên, kal rĕng chêh bro klêi mâu hlá mơ-éa luât; séa ngăn tơdâng kơxô̆ liăn; rơkê tung pêi cheăng, tơniăn tơdroăng tơvâ mê athế pâ thế ƀă Kuô̆k hô̆i tŏng kum; mâu kong pơlê pêi pro klêi hnoăng cheăng ki ‘mâi xĕn kế tơmeăm khoăng, gu bro tơbăng tơnêi tơníu vâ bro troăng tiô tơdroăng ki rơkê, pơkâ tơleăng klêi mâu tơdroăng ki kuăn pơlê hêng hôu.

Kăn pơkuâ hnê ngăn Đảng, Kăn hnê ngăn Vi ƀan athế veăng kum. Ngế pro xiâm hnê ngăn tơnêi têa pơkâ thế mâu kong pơlê hbrâ rơnáu, kơhnâ tâ tung hnoăng cheăng kố, bro tơnêi tơníu mơnhông nếo, rơtế a mê cho pêi pro tro hnoăng cheăng pơkâ; rĕng tăng ‘nâi mâu túa pơkâ ki nếo ‘na tơnêi tơníu ƀă mâu tơdroăng kal ki ê.