Tiô pơkâ pêi troăng prôk ƀă rơxế kơtâu Pơlê kong xiâm Hà Nội troh hơnăm 2030 ƀă tơmiât pêi troh hơnăm 2050, troăng rơxế lơtreng tíu kơdrâm kuăn pơlê rêh ối tê mơdró pơlê kong xiâm xŏn dâng 410 km. Tơdroăng kal liăn sap ing kố troh hơnăm 2030, Hà Nội kal dâng 15 rơtal dollars. A pơlê kong kân Hồ Chí Minh, tơdroăng tơkêa bro pơhlêh Pơkâ pêi tơdjuôm troh hơnăm 2040, tơmiât pêi troh hơnăm 2060, troăng rơxế lơtreng ai 12 troăng, ƀă tâi tâng xŏn dâng 510 km.

Tâi tâng tơdroăng kal vâ kơxô̆ liăn mơ’no mơjiâng troh hơnăm 2035 cho dâng lối 36 rơtal dollars. Mơgêi hneăng hôp, pôa Phạm Minh Chính, Ngế pro xiâm hnê ngăn tơnêi têa pơkâ tung tơdroăng mơjiâng tơdroăng tơkêa bro thế ai tơmiêt ki mơnhông, tơmiât pêi hơngế, ton xŏn, djâ ki pơxúa hên. Ngế pro xiâm hnê ngăn tơnêi têa pơkâ thế Khu xiâm pơkuâ troăng prôk ƀă rơxế kơtâu, mâu khu xiâm, kơvâ cheăng ƀă Hà Nội, Pơlê kong kân Hồ Chí Minh tơrŭm tâi tâng mâu pơkâ, tơdroăng pêi tơdjâk mơjiâng pro troăng rơxế lơtreng tíu kơdrâm kuăn pơlê rêh ối tê mơdró. Pơkâ mơjiâng troăng rơxế lơtreng tíu kơdrâm kuăn pơlê rêh ối tê mơdró rah xo kŏng ngê̆ tiô rơxông nếo, tơtro ƀă tơdroăng dêi Việt Nam; hên ‘na kơxô̆ liăn tá kơxô̆ liăn tơnêi têa, kơxô̆ liăn krê ƀă kơxô̆ liăn mung.