Koh phiu ro leh tơbâ 80 hơnăm Hâi mơjiâng Khu lêng kuăn pơlê Việt Nam, 35 hơnăm Hâi xah hêi ro hnoăng gâk kring rak tơnêi têa tâi tâng kuăn pơlê, kơxo lơ 19/12, pôa Phạm Minh Chính, Ngế pro xiâm hnê ngăn Chin phuh veăng pơxiâm po Mơđah tơbleăng hnoăng cheăng gâk kring rak tơnêi têa lâp plâi tơnêi Việt Nam hơnăm 2024 – pêi cheăng tiô tơdroăng ki xiâm ƀă cho tíu ki rơdêi kơnâ, râ lâp plâi tơnêi.

Xông tơpui a leh pơxiâm po ƀă tiê nŭt pơxiâm po Mơđah tơbleăng, pôa Phạm Minh Chính, Ngế pro xiâm hnê ngăn Chin phuh tối Mơđah tơbleăng hnoăng gâk kring rak tơnêi têa lâp plâi tơnêi Việt Nam ai kơnâ ki má môi, cho tơdroăng kal lâp plâi tơnêi ki má môi ƀă pơtâng hnê tối ‘’Hơniâp lĕm – Tơrŭm – Mơnhông mơdêk’’, kum mơdêk tơpui tơno ƀă kong têa ê ƀă tơrŭm hnoăng gâk kring rak tơnêi têa tung tâi tâng mâu kơvâ cheăng; xua hơniâp lĕm, tơniăn, tơrŭm cheăng ƀă mơnhông a kơpong ƀă lâp plâi tơnêi.

Ngế pro xiâm hnê ngăn tơnêi têa mơnhên, Việt Nam môi tuăn sap apoăng troh tá tui lui pêi pro troăng prôk tơpui kâ ƀă kong têa ê ‘’tơniăn krê, pơkuâ xêh, pêi pro hên troăng, pêi pro hên tơdroăng tơrŭm, cho pú hmâ ki lĕm, cho khu tơrŭm cheăng ki loi tơngah ƀă tâi tâng mâu kong têa ƀă cho khu tơrŭm cheăng ki păng ‘nâng, ai hnoăng cheăng dêi mâu kong têa lâp plâi tơnêi.