A roh trâm mâ tơpui tơno, mâu sinh viên Đăi hok Kuô̆k ya Hà Nội hiăng tối tơmâng troh troăng hơlâ hnê hriâm, khoa hok, kŏng ngê̆ ƀă pơ’lêh nếo tơmiât pêi rơkê dêi kong têa Singapore; tơrŭm cheăng kâ xúa kŏng ngê̆ - cheăng kâ ngiât lĕm pơla péa tơnêi têa; mâu túa ki rơkê tơtro, ƀai ki kơnâ tung tơdroăng hriâm tâp, pơtâp vâ châ tơƀrê dêi pôa Lý Hiển Long; troăng hơlâ mơdêk tơrŭm cheăng pơla mâu đăi hok dêi kong têa Singapore ƀă Việt Nam, ki rơhêng vâ tối tung mâu kơvâ hriăn plĕng, pơ’lêh nếo tơmiât pêi rơkê, tuăn tơmiêt pêi rơkê kuăn mơngế; pói vâ dêi mâu khu râ kăn pơkuâ ƀă rơxông ối nếo.

Klăng roh kố, ing châ hlo dêi pôa Phạm Minh Chính ƀă pôa Lý Hiển Long, Đăi hok Kuô̆k ya Hà Nội, Đăi hok Kuô̆k ya Hồ Chí Minh rơtế Đăi hok Kŏng nghê̆ Nanyang – Singapore hiăng kĭ mơ-éa môi tuăn tơrŭm cheăng pơla mâu đăi hok tung kơvâ tơpui tơno kăn ƀô̆, thái hnê, sinh viên ƀă hriăn plĕng khoa hok.