VOV4.Xơ Đăng - Kơxo lơ 18/4, pôa Phạm Minh Chính, Ngế pro xiâm hnê ngăn tơnêi têa hiăng lăm pôu, mơhnhôk mâu ngế tơ’noăng, mâu ngế hnê tơ’noăng ƀă séa ngăn tơdroăng tơkŭm po SEA Games 31 a Tíu xiâm hnê pơtâp ivá tơnêi têa Hà Nội ƀă Tíu tơ’noăng kơtâu tung hngêi Mỹ Đình, Plông tơ’noăng Tơnêi têa Mỹ Đình. Khu pú hên kăn ƀô̆, ngế ki hnê tơ’noăng, mâu ngế tơ’noăng Tíu xiâm kô mơ-eăm tơ’noăng, khŏm mơ-eăm châ lối 100 mê dái a mâu SEA Games roh kố.

Pôa Phạm Minh Chính, Ngế pro xiâm hnê ngăn tơnêi têa séa ngăn tơdroăng hbrâ ăm Sea Games 31

A roh trâm mâ, pôa Phạm Minh Chính pói vâ mâu ngế tơ’noăng, ngế hnê tơ’noăng, mâu khu tơ’noăng ƀă khu pú hên tơ’noăng Việt Nam pơtối rak môi tuăn, mơnhông châ tơƀrê mâu tơdroăng châ tơƀrê ing mâu rơxông, mơ-eăm tơkâ hluâ mâu pá puât, pơloăng mơnúa, thăm pơtâp tá hiâm mơ’no, châ chăn, tơdroăng tơ’noăng hbrâ vâ châ kâ, châ kâ hên má môi a SEA Games 31. Ngế pro xiâm hnê ngăn tơnêi têa tối rơdêi: SEA Games 31 cho roh tơ’lêi ƀă cho tơdroăng tơ’lêi hlâu vâ tơ’noăng ivá Việt Nam mơhno ki khên tơnôu, ivá ó rơdêi, mâu tơdroăng châ kâ ối má môi tâi tâng khu. Kố xuân cho roh vâ tơnêi têa pin phiu ro, tơbleăng um méa, kuăn mơngế Việt Nam ƀă tơmối lâp plâi tơnêi.

A Sa Ly tơplôu ƀă tơbleăng