A roh tơdah, pôa Phạm Minh Chính, Ngế pro xiâm hnê ngăn tơnêi têa kheăn kơdeăn Kăn xiâm hnê ngăn ƀă SIA hiăng ai hên tơdroăng pêi, troăng tơmiât pêi rơkê môi tuăn Việt Nam mơjiâng kơvâ kơmăi kơmok pro tơmeăm chiâng hrik mơ’no hyôh rơ’jíu, tơdjêp hên khu tê mơdró ối tung khu SIA ti tăng roh tơ’lêi hlâu tê mơdró, tơrŭm tê mơdró a Việt Nam.

Ngế pro xiâm hnê ngăn tơnêi têa pơkâ thế SIA pơtối krếo mâu khu pơkuâ kong têa Mih tơrŭm, mơ’no liăn cheăng trâu rơdâ tâ, châ tơƀrê tâ ƀă Việt Nam tung kơvâ kế ki chiâng hrik mơ’no hyôh rơ’jíu, tuăn ngôa rơkê, điê̆n toăn đám mây... cho mâu kơvâ ki kal ƀă la ngiâ dêi kuăn mơngế xuân môi tiah tơdroăng mơnhông dêi rêm tơnêi têa. Rơtế ƀă mê, Ngế pro xiâm hnê ngăn tơnêi têa pơkâ thế Kăn hnê ngăn, mâu khu tê mơdró SIA ai rơkong tơpui ƀă khu râ kăn pơkuâ Mih pơtối mơdêk tơrŭm ƀă Việt Nam trâu hơngế, păng ‘nâng, châ tơƀrê, rĕng mơnhên Việt Nam ai tơdroăng cheăng kâ kơchơ mơdró ƀă tah lôi mâu tơdroăng ki kơdroh tơdjâk tê ngi kong têa ê kŏng ngê̆ rơxông nếo ƀă Việt Nam.