Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên tơdroăng hnoăng kuăn mơngế cho tơdroăng ki păng ‘nâng, ôh ti xê to tơkŭm ƀă châ pơkâ tung tơdroăng tơkŭm dêi tơdroăng hnê hriâm Việt Nam. Tung mê xo hok tro, sinh viên cho ngế ki xiâm, tâi tâng; thái cô cho ivá; hngêi trung cho tíu ki mơdêk; rơpŏng hngêi cho tíu hơgiên; pơlê pơla cho ivá rơdêi; pêi pro tơdroăng hriâm tâp plâ rơxông.

Pôa Phạm Minh Chính, Ngế pro xiâm hnê ngăn tơnêi têa loi, ƀă tơdroăng tơrŭm môi tuăn, tơdjuôm ivá, môi hiâm mơno dêi mâu khu pơkuâ tơdroăng kal kí, dêi tâi tâng kuăn pơlê, tâi tâng khu lêng pin, tơdroăng rak vế hnoăng kuăn mơngế ƀă hnê hriâm hnoăng kuăn mơngế rế hía rế châ tơƀrê tơniăn lĕm, veăng gum kal khât pêi pro pơhlêh tơdroăng rơhêng vâ mơjiâng tơnêi têa Việt Nam xah hô̆i chuh ngiah kuăn pơlê kro, tơnêi têa rơdêi, tơniăn krê tơdâng rơkê plĕng, krá rơdêi tung troăng mot tung chal nếo - chal ki kro rơdêi dêi hdroâng mơngế.