Kơxo lơ 11/12, a Pơlê kong kơdrâm Cao Lãnh, pôa Tô Lâm, Kăn xiâm pơkuâ hnê ngăn Đảng pơkuâ djâ khu kăn ki pêi dêi hnoăng cheăng Tơnêi têa pơkuâ po rôh pêi cheăng ƀă Khu pơkuâ ngăn Đảng ƀô̆ kong pơlê Đồng Tháp ‘na pêi pro Pơkâ Hneăng hôp 13 dêi Đảng, Pơkâ Hneăng hôp khu kăn Đảng ƀô̆ kong pơlê Đồng Tháp rôh má 11, pơla hơnăm 2020 – 2025; tơdroăng ki pêi pro Pơkâ kơxô̆ 35 dêi Khu xiâm pơkuâ tơdroăng kal kí ‘na hneăng hôp Đảng ƀô̆ rêm râ pêi pro troh Hneăng hôp khu kăn lâp tơnêi têa rôh má 14 dêi Đảng.

Tơpui hnê mơhno a rôh pêi cheăng, klêi kơ’nâi hmâng pơchuât tơbleăng ƀă mâu rơkong tơpui tối dêi kăn teăng mâ mâu khu xiâm, kơvâ cheăng, pôa Tô Lâm, Kăn xiâm pơkuâ hnê ngăn Đảng khĕn kơdeăn mơnhên tối ƀă tơmâng xo tơdroăng ki mơ-eăm mâu tơdroăng pêi châ tơƀrê ki Đảng ƀô̆, kăn pơkuâ ƀă kuăn pơlê kong pơlê Đồng Tháp hiăng chiâng pêi pro tung pơla hdrối nah.

Tối nhên hơnăm 2025 cho hơnăm ki mơdêk rơdêi, mơnhông tơƀrê, plah vâ mơ-eăm châ chiâng pêi mâu tơdroăng ki tơƀrê má môi mâu tơdroăng pơkâ mơ’no dêi túa pơkâ mơnhông cheăng kâ rêh ối pơlê pơla 5 hơnăm, pơla hơnăm 2021 – 2025 ƀă Pơkâ Hneăng hôp khu kăn Đảng ƀô̆ kong pơlê Đồng Tháp rôh má 11, pơla hơnăm 2020 – 2025, Kăn xiâm pơkuâ hnê ngăn Đảng pơkâ thế, Khu pơkuâ ngăn Đảng ƀô̆ kong pơlê Đồng Tháp ai troăng tơleăng kơtăng, pơtê vâ pêi pro ƀlêi chiâng hnoăng cheăng mơnhông cheăng kâ rêh ối pơlê pơla hơnăm 2025, tơkŭm mơ-eăm pêi châ a kơlo ki kân má môi dêi mâu tơdroăng pơkâ pêi hiăng mơ’no, malối cho mâu tơdroăng pơkâ ki tơdjâk troh mơdêk cheăng kâ, pêi lo liăn dêi kuăn pơlê.