Hôp tơpui tơno veăng amê ai lối 150 kăn teăng mâ cho teăng mâ mâu kơ koan pơkuâ tơnêi têa, khu tơrŭm kơvâ cheăng ƀă khu tê mơdró. A hôp tơpui tơno, mâu kăn teăng mâ hiăng tơkŭm tung mâu tham luâ̆n ki xiâm môi tiah ‘’mơjiâng inâi’’ – ƀai toăn ki pá dêi kơvâ báu phái Việt Nam, mơjiâng inâi tơnêi têa ăm phái Việt Nam – ‘’Pơloăng mơnúa ƀă roh tơ’lêi’’. Pakĭng mê, mâu ngế ki rơkê pêi chiâk deăng, mâu khu tê mơdró pêt mơjiâng ƀă tê mơdró dêi kơvâ báu phái xuân hiăng ai hên tơdroăng ki veăng tơpui, mâu troăng vâ mơjiâng châ tơƀrê inâi tơnêi têa ăm phái Việt Nam.

Pơkâ xiâm dêi Hôp tơpui tơno cho mơjiâng môi hôp tơpui tơno ki po, kơbông krếo tơdroăng ki veăng dêi mâu ngế rơkê má môi, mâu khu tê mơdró ƀă mâu khu pơkuâ ai hên túa ki rơkê tơtro, vâ pêi pro mâu pơkâ ki kal, kum mơjiâng inâi phái Việt Nam rế krá tơniăn tung lâp plâi tơnêi.