Pôa Phạm Minh Chính phiu ro kăn pơkuâ kong pơlê kân Hạ Saxony roh apoăng lăm pôu Việt Nam rơtế khu tê mơdró kơdrâm tung pơla tơrŭm cheăng ton xŏn Việt Nam – Alơmăng mơnhông lĕm. Pôa Phạm Minh Chính pơkâ thế péa pâ mơdêk tơrŭm cheăng kal kí – tơpui kâ ƀă kong têa ê, tê mơdró – mơ’no liăn cheăng, hbrâ ví kong prâi hơ’lêh, hnê mơjiâng cheăng pêi, ôm hyô, trâm mâ tơpui tơno kuăn pơlê, vâ djâ pơxúa ăm rêm kong têa, mơdêk hlê plĕng dêi pó pơla kuăn pơlê péa tơnêi têa ƀă veăng kum ăm hơniâp lĕm, tơrŭm cheăng ƀă mơnhông a kơpong ƀă lâp plâi tơnêi.

Tiô hiâm mơno pâ mơnê, achê ƀă loi tơngah, pôa Phạm Minh Chính pơkâ thế Khu râ kăn pơkuâ kong pơlê Hạ Saxony mơhnhôk mâu khu tê mơdró dêi kong pơlê mơ’no liăn cheăng a Việt Nam tung mâu kơvâ ki rơdêi ƀă tơdroăng kal vâ dêi péa pâ môi tiah kŏng ngê̆ rơxông nếo, xúa kŏng ngê̆, pơhlêh pêi cheăng krúa lĕm, hbrâ ví kong prâi hơ’lêh ƀă hía hé.