VOV4.Xơ Đăng - A tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa tơdah Kăn teăng mâ Mông Cổ koh trâm mâ tơpui tơno klăng roh tơdah hnoăng cheăng pêi cheăng a Việt Nam. A roh tơdah, pôa Phạm Minh Chính tối nhên, péa tơnêi têa ai tơrŭm tiô khôi vâi krâ nah, môi tuăn, tŏng kum dêi pó tung mơjiâng ƀă mơnhông tơnêi têa, tung pơla pơreăng kân COVID-19 tơdjâk ôh tá lĕm tro troh tơdroăng lâp plâi tơnêi ƀă kơpong laga tơrŭm cheăng pơla péa tơnêi têa pơtối thăm châ rak kơlo tơtêk.

Pôa Phạm Minh Chính, Ngế pro xiâm hnê ngăn tơnêi têa tơdah Kăn teăng mâ Mông Cổ

Ngế pro xiâm hnê ngăn tơnêi têa pơkâ thế péa pâ pơtối môi tuăn tŏng kum dêi pó tung mâu hneăng hôp hên kong têa ƀă Mông Cổ pơtối môi tuăn troăng tơmiât pêi dêi ASEAN ƀă Việt Nam tung tơleăng hơniâp lĕm mâu tơdroăng tơxup tơbriât, tơniăn gak kring, tơniăn troăng tơƀai, troăng têa kơxĭ a têa kơxĭ Biển Đông.

Kăn teăng mâ Mông Cổ môi tuăn ƀă mâu pơkâ tơrŭm cheăng dêi pôa Phạm Minh Chính, tối nhên, kô mơ-eăm tơrŭm krá tơniăn ƀă mâu kơ koan Việt Nam thăm mơnhông tâ mê nếo tơrŭm cheăng tiô khôi vâi krâ nah pơla péa tơnêi têa, thăm tơrŭm cheăng kâ, tê mơdró, mơ’no liăn cheăng, troăng klông ƀă trâm mâ pơla kuăn pơlê péa tơnêi têa.

A Sa Ly tơplôu ƀă tơbleăng