A rôh tơdah, pôa Phạm Minh Chính, Ngế pro xiâm hnê ngăn tơnêi têa tối phiu ro drêng tơdroăng tơrŭm cheăng pơla péa tơnêi têa châ hlo tơƀrê hên. Ƀih cho kong têa tung khu tơrŭm cheăng tê mơdró má môi dêi Việt Nam tung EU ƀă Việt Nam cho tơrŭm cheăng tê mơdró kân má môi dêi Ƀih tung ASEAN; thăm tơrŭm cheăng pơla Kuô̆k hô̆i Việt Nam ƀă Kuô̆k hô̆i Ƀih pêi mâu tơdroăng cheăng hlo mơnhông tơƀrê tâ nếo.

Tung la ngiâ, Ngế pro xiâm hnê ngăn tơnêi têa pơkâ thế péa pâ pơtối mơdêk tơpui tơno tơrá mâu kăn; mơdêk tơrŭm cheăng kâ, tê mơdró, ‘no liăn cheăng, mơ-eăm djâ tơmeăm pê lo pơla péa pâ rĕng châ 7 rơtal dollars tung hơnăm la ngiâ.

Kăn xiâm hnê ngăn Kuô̆k hô̆i Ƀih tối, Kuô̆k hô̆i Ƀih kô mơ-eăm mơdêk tơrŭm cheăng pơla Việt Nam - Ƀih mơnhông trâu rơdâ tâ nếo ƀă hên tơdroăng pêi pro, tơdroăng tơkêa pro ki nhên, tung mê ai mâu tơdroăng Ngế pro xiâm hnê ngăn tơnêi têa hiăng tối, malối ‘na pơ’lêh hriăn plĕng, mơnhông tê mơdró, tơrŭm cheăng mung hdrối tơmeăm ƀă kơjo kum mâu ngế ki tro trếo ‘mêi dioxin Việt Nam.