VOV4.Xơ Đăng - Kơxo lơ 20/5, a Hà Nội, pôa Phạm Minh Chinh, Ngế pro xiâm hnê ngăn tơnêi têa tơdah pôa Tan Chuan-Jin, kăn xiâm hnê ngăn Kuô̆k hô̆i Singapore dế lăm pôu a Việt Nam. A rôh tơdah, pôa Phạm Minh Chính pơkâ thế péa pâ mơdêk mâu rôh lăm pôu, trâm mâ mâu kăn xiâm ƀă rêm râ a tâi tâng mâu tơdroăng; tơbleăng pêi tơ-brê mâu luât pơkâ, tơhrâ tơrŭm pơla péa pâ, malối cho hneăng hôp kăn xiâm ‘na tơdjêp cheăng kâ Việt Nam- Singapore.

Ngế pro xiâm hnê ngăn tơnêi têa púi vâ Kuô̆k hô̆i péa pâ pơtối môi tuăn dêi rơpó, pro tơ’lêi hlâu tung tơrŭm’mâi mơnhông ƀă mơdêk cheăng kâ klêi kơ’nâi ai pơreăng kân, tung mê, tơkŭm a mâu tơdroăng Singapore ai rơdêi ƀă Việt Nam ai púi vâ môi tiah: pơ’lêh hriăn plĕng ki nếo, on tơhrik krúa, cheăng kâ kơxô̆, hên túa cheăng lâp plâi tơnêi.

Pôa Phạm Minh Chính, Ngế pro xiâm hnê ngăn tơnêi têa tơdah Kăn xiâm Kuô̆k hô̆i Singapore

Péa ngế kan xiâm tơpui ‘na tơdroăng tung kơpong, tung lâp plâi tơnêi ƀă mâu tơdroăng ki péa pâ rơtế vâ ‘nâi plĕng, tung mê tối nhên ASEAN kal mơ-eăm môi troăng rơhlâ pơkâ ‘na Biển Đông, tơleăng mơnhên tơbriât dêi rơpó a têa kơxĭ ƀă troăng rơhlâ hơniâp lĕm, ing tơdroăng pêi pro tro luât lâp plâi tơnêi tá Tơdroăng tơhrâ Khu lâp kong tea ‘na Luât têa kơxĭ hơnăm 1892 (UNCLOS 1982) ƀă tơdroăng ki kal dêi pơtối rak hơniâp lĕm, tơniăn, a troăng têa kơxĭ ƀă troăng tơ-ƀai a Biển Đông.

Gương tơplôu ƀă tơbleăng