Pôa Phạm Minh Chính, Ngế pro xiâm hnê ngăn tơnêi têa tối, Việt Nam đi đo nhoăm tơdroăng tơrŭm cheăng kâ ƀă Mih, hâk mơnê tơdroăng Mih mơdêk tơrŭm cheăng ƀă Việt Nam, nhoăm luât kal kí hlối môi tuăn ƀă Việt Nam “rơdêi, tơniăn krê, mơ-eăm mơnhông tơná ƀă kro mơdrŏng’’.

Tung la ngiâ, Ngế pro xiâm hnê ngăn tơnêi têa vâ péa tơnêi têa pơtối mơdêk mâu hneăng lăm pôu dêi rơpó tơrá kăn xiâm ƀă rêm râ, tơpui tâi tâng khu kăn Kuô̆k hô̆i péa pâ, pơtroh rơkong krếo khu kăn Kuô̆k hô̆i hơnăm ối nếo Mih veăng hôp to Khu kăn Kuô̆k hô̆i  hơnăm ối nếo tung lâp plâi tơnêi rôh má 9 xua Kuô̆k hô̆i Việt Nam chêh inâi tơkŭm po.

Ngế pro xiâm hnê ngăn tơnêi têa pơkâ thế, péa tơnêi têa mơdêk tơrŭm tung mâu kơvâ cheăng kâ, tê mơdró, ‘no liăn cheăng, khoa hok kơmăi kơmok, hnê hriâm hnê mơjiâng tuăn ngôa rơkê, mơjiâng pro chíp hrik hyôh rơ’jíu, hơ’lêh kơxô̆, hơ’lêh on tơhrik, mơdêk pêi cheăng ngiât lĕm, hên túa cheăng pêi hdrối ƀă hbrâ ví xía vâ xua kong prâi hơ’lêh.