VOV4.Xơ Đăng - Kơxê lơ 16/6, pôa Phạm Minh Chính, Ngế pro xiâm hnê ngăn tơnêi têa  tơdah Kăn teăng mâ kong têa Egipto a Việt Nam troh koh hmât trâm mâ tơpui tơno. A roh tơdah, Ngế pro xiâm hnê ngăn tơnêi têa mơnhên Việt Nam đi đo nhuô̆m khôi túa rŭm môi tuăn, tơrŭm cheăng pơla péa tơnêi Việt Nam – Egipto. Ngế pro xiâm hnê ngăn tơnêi têa pơkâ thế péa pâ kal tơrŭm krá tơniăn vâ djâ tơrŭm cheăng hên tơdroăng pơla péa tơnêi têa mot trâu hơngế, păng ‘nâng ƀă châ tơƀrê ing mâu khu mâu troăng pêi môi tiah: thăm trâm mâ, tơpui tơno khu râ kăn tung mâu kơvâ cheăng kal kí, cheăng kâ.

Pôa Phạm Minh Chính, Ngế pro xiâm hnê ngăn tơnêi têa tơdah Kơ koan teăng mâ Egipto

Ngế pro xiâm hnê ngăn tơnêi têa péa pâ thăm tơrŭm tung mâu kơvâ cheăng lâp plâi tơnêi môi tiah tung mâu hneăng hôp hên kong têa; môi tuăn troăng tơmiât pêi dêi ASEAN ƀă Việt Nam ‘na tơdroăng Biển Đông; thăm tơrŭm gâk kring – cheăng lêng ƀă thăm tơrŭm veăng khu rak hơniâp lĕm dêi Khu lâp kong têa, ing tơdroăng nhuô̆m hnoăng ƀă ki pơxúa dêi luât, tơxâng dêi mâu kong têa veăng kum tung mơjiâng hơniâp lĕm, tơniăn, tơrŭm ƀă mơnhông mơdêk tung kơpong ƀă lâp plâi tơnêi.

A Sa Ly tơplôu ƀă tơbleăng