Ngế pro xiâm hnê ngăn tơnêi têa phiu ro pơkâ dêi grup pơkuâ mơ’no liăn cheăng a kơvâ on tơhrik vêh pro dêi Việt Nam, tối rơdêi, Việt Nam mơnhên mơjiâng on tơhrik ki vêh bro chiâng on tơhrik nếo cho hnoăng cheăng ki kal. Tối ăm ‘nâi Việt Nam mơnhên tơtêk GDP sap ing 8% tung hơnăm 2025 ƀă péa kơxô̆ tung mâu hơnăm la ngiâ ƀă tơdroăng kal vâ on tơhrik tâk hên, tơdrêng amê mơdêk tê ngi kong têa ê on tơhrik krúa lĕm. Ngế pro xiâm hnê ngăn tơnêi têa pâ thế grup thăm mơ’no liăn cheăng, tê mơdró a Việt Nam ‘na pơhlêh krúa lĕm, on tơhrik krúa lĕm, on tơhrik ki vêh pro; hriăn plĕng, mơ’no liăn pro on tơhrik, troăng kơxái on tơhrik vâ tơniăn bê on tơhrik.

Pơtối mê, Ngế pro xiâm hnê ngăn tơnêi têa tơdah jâ Nicola Beer, Phŏ Kăn hnê ngăn Hngêi arak liăn mơ’no liăn cheăng châu Âu, pôa Phạm Minh Chính mơnê châu Âu ƀă hngêi arak liăn châu Âu đi đo rơtế, tŏng gum Việt Nam tung pơla kố nah, tung mê ai mâu tơdroăng tơkêa bro ‘na pơhlêh on tơhrik. Phŏ Kăn hnê ngăn Hngêi arak liăn châu Âu môi tuăn hên ƀă mâu tơdroăng xiâm tơpui tơno dêi Ngế pro xiâm hnê ngăn tơnêi têa, mơnhên, Việt Nam cho troăng ki mơnhông ki hên kong têa kô chiâng vâ hriâm ƀối.