VOV4.Xơ Đăng - Kơxê lơ 13/7, a ƀơrô Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah jâ Pauline Tamesis, Ngế kum pêi hnoăng cheăng dêi khu lâp kong têa troh pơtroh kơthô ăm pơcháu cheăng dêi Ngế xiâm chêh tôm xo rơkong khu lâp kong têa, pơxiâm apoăng hneăng cheăng a Việt Nam. a rôh tơdah, Ngế pro xiâm hnê ngăn  tơnêi têa ăm ‘nâi: Việt Nam hiăng mơ-eăm ƀă ai hên hnoăng veăng ‘no tung mâu tơdroăng cheăng dêi Khu lâp kong têa, tung mê, ai hnoăng cheăng pêi tơ-brê hneăng pro Ngế cheăng tung khu ôh tá hmâ Hô̆i đong kring vế khu lâp kong têa, mơdêk hnoăng veăng ‘no pêi tung mâu tơdroăng cheăng kring vế hơniâp lĕm dêi khu lâp kong têa.

Ngế pro xiâm hnê ngăn Chin phuh vâ Khu lâp kong têa kô pơtối rơtế ƀă hlối veăng kơjo kum tơ-ƀrê Việt Nam tung mâu hơnăm la ngiâ, malối tung pêi pro mâu Pơkâ mơnhông mơdêk krá tơniăn ton, ‘mâi mơnhông tơnêi têa klêi kơ’nâi ai pơreăng kân, rak tơniăn tơdroăng rêh ối pơlê pơla, kơjo kum pêi mâu tơdroăng tơhrâ ‘na hơ’lêh hyôh kong prâi. Ngế pro xiâm hnê ngăn tơnêi têa tối Chin phuh Việt Nam kô pơtối mơdêk mâu tơdroăng tơrŭm ƀă Khu lâp kong têa ƀă pro tơ’lêi hlâu má môi ăm mâu khu tơrŭm cheăng Khu lâp kong têa tơbleăng pêi tơbrê mâu tơdroăng cheăng, tơdroăng tơkêa bro tơrŭm cheăng a Việt Nam.

Gương tơplôu ƀă tơbleăng