Pôa Phạm Minh Chính, Ngế pro xiâm hnê ngăn Chin phuh phiu ro jâ Penny Wong rôh má péa pôu Việt Nam tung hnoăng cheăng Ngế xiâm tơpui kâ Australia; tối tơngah, pơtối mâu rôh pôu ki ƀlêi chiâng pơla hdrối kố nah dêi kăn pơkuâ Australia, rôh lăm pôu kố dêi Ngế xiâm tơpui kâ kô veăng kum kal khât tung tơdroăng rak vế ivá, mơdêk tơrŭm cheăng kong têa tơrŭm cheăng tung la ngiâ Việt Nam – Australia dế mơnhông mơdêk rơdêi tung hơnăm péa tơnêi têa tơbâ 50 hơnăm hâi mơjiâng tơrŭm cheăng tơpui kâ (1973-2023).

Pôa Phạm Minh Chính, Ngế pro xiâm hnê ngăn tơnêi têa tối nhên, péa tơnêi têa kal thăm mơdêk tơrŭm ‘na hnê hriâm, pêi cheăng, trâm mâ mơhno túa lĕm tro, kuăn pơlê, mơhnhôk khu mơdró kâ péa tơnêi têa po rơdâ ‘no liăn tung mâu kơvâ cheăng ki péa pâ ai ivá rơdêi; tơdrêng amê hlối mơdêk tơrŭm tung mâu kơvâ cheăng nếo môi tiah hbrâ ví ƀă kong prâi pro hơ’lêh, hơ’lêh on tơhrik, mơdêk ngiât, cheăng kâ kơxô̆, hơ’lêh kơxô̆ ƀă hên kơvâ cheăng ki ê.