VOV4.Xơ Đăng -Kơxê lơ 13/4, a tíu pêi cheăng Chin phuh pôa Phạm Minh Chính, Ngế pro xiâm hnê ngăn tơnêi têa hiăng tơdah Ngế xiâm tơpui kâ Canada drêng rôh lăm  pôu Việt Nam. A rôh tơdah, pôa Phạm Minh Chính  tối sôk ro drêng tơdroăng tơrŭm cheăng pơla péa tơnêi têa pơtối mơnhông mơdêk tơ-brê ƀă  ki khât. 

Ngế xiâm tơpui kâ Canada môi tuăn ƀă mâu tơdroăng pâ thế dêi pôa  Phạm Minh Chính ‘na mâu tơdroăng mơdêk tơrŭm cheăng pơla péa tơnêi têa tung la ngiâ, malối cho rôh péa tơnêi têa tơbâ 50 hơnăm tơrŭm cheăng  tơpui kâ a hơnăm 2023.

Pôa Phạm Minh Chính, Ngế pro xiâm hnê ngăn tơnêi têa tơdah Ngế xiâm tơpui kâ Canada

Ngế xiâm tơpui kâ Canada ăm ‘nâi hneăng  lăm pôu cho tung tơdroăng pơkâ pêi dêi Ấn Độ Dương - Thái Bình Dương nếo dêi Canada, ing mê Canada púi vâ mơdêk tâ nếo tơrŭm cheăng ƀă mâu kong têa tung kơpong, tung mê ai Việt Nam cho kum ahdrối. Péa pâ xuân tơpui ƀă dêi rơpó ‘na tơdroăng Biển Đông, tối nhên ki kal dêi tơdroăng tơleăng mơnhên  ki tơbriêt dêi rơpó ƀă troăng rơhlâ pro hơniâp lê̆m ngăn tiô kơ luât lâp plâi tơnêi ƀă luât Tơhrâ dêi Khu lâp kong têa ‘na Luât têa kơxĭ 1982 (UNCLOS); cho tŭm tâi tâng DOC, mơjiâng COC ki khât, tơ-brê, xêt; tơniăn  ngăn tiô vâ, tơniăn lĕm, kring tơniăn a têa kơxĭ, a tơ-ƀai a Biển Đông, ngăn tiô kơ tơdroăng ki pơxúa dêi tâi tâng mâu kong têa.

Gương tơplôu ƀă tơbleăng