VOV4.Xơ Đăng - Kơxê lơ 27/6, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh hiăng tơdah jâ Penny Wong, Ngế xiâm tơpui kâ kong têa Australia troh koh hmât drêng jâ dế ối pôu Việt Nam sap ing hâi lơ 26 – 28/6/2022. A rôh tơdah, pôa Phạm Minh Chính, Ngế pro xiâm hnê ngăn tơnêi têa mơnhên tối khât tơdroăng ki mơnhông rơdêi dêi tơrŭm cheăng la ngiâ Việt Nam – Australia tung pơla hdrối nah, pơtroh mâu kăn xiâm ƀă mâu rôh trâm mâ khu kăn xiâm xuân châ tơbleăng tơdâng tơ’mô; kơxô̆ liăn pêi lo ing tê mơdró pơla péa pâ rôh apoăng tơkâ luâ 10 rơtal dollars, châ 12,4 rơtal dollars a hơnăm 2021 ƀă Việt Nam pơxiâm ‘no liăn cheăng tơdrêng a Australia.

Pôa Phạm Minh Chính pơkâ thế Chin phuh nếo dêi Australia pơtối tơmâng ngăn, mơdêk tơrŭm cheăng ƀă Việt Nam, mơdêk tơrŭm cheăng tê mơdró ƀă ‘no liăn tung mâu tơdroăng ki pơxúa tơƀrê ƀă ki ai hlâu dêi péa tơnêi têa, mơdêk rơdêi tơrŭm hnê hriâm – hnê cheăng pêi, mơhno túa lĕm tro, ôm hyô.

Katarina Nga tơplôu ƀă tơbleăng