Tơtêk GDP sap ing khế 7 troh khế 9 châ 5,33%, riân tơdjuôm 9 khế châ 4,24%. Kơlo têk chu yă rôe xúa tơmeăm CPI tơdâng 9 khế tâk 3,16%. Kơchơ liăn ngân, liăn kong têa ê tơniăn, kơlo liăn rơkâ kơdroh. Tê rôe tơmeăm ngi kong têa ê tâk chôa ‘lâng ing mâu khế, 9 khế tê châ hên vâ châ 22 rơtal dollars.

‘Na hnoăng cheăng, troăng pêi ki xiâm mâu khế mơ’nui hơnăm 2023, pôa Phạm Minh Chính tối nhên kô pơtối kơjo mơdêk tơtêk, rak krá tơniăn cheăng kâ kân, mơdât liăn chu rơpâ yă, tơniăn mâu tơdroăng tơdâng kân dêi tơdroăng cheăng kâ; tơkŭm pêi pro mâu troăng mơdêk ó rơdêi mâu tơdroăng tơtêk (mơ’no liăn, tê rôe tơmeăm, tê tơmeăm ngi kong têa ê); xúa tơtro roh mơdró kâ tơ’lêi kơchơ tung tơnêi têa, lâp plâi tơnêi roh mơ’nui hơnăm, leh, Têt.